இசை, குடும்ப உறவுகள், பெற்றோர்-பிள்ளை பாசம் ஆகியவற்றை மையமாக வைத்து உருவாகியுள்ள உணர்வுப்பூர்வமான குடும்ப திரைப்படம் தான் “சாருகேஸி”.
சங்கீத உலகில் மிகப்பெரிய வித்வானாகவும், எண்ணற்ற விருதுகளை வென்ற கலைஞராகவும் திகழ்கிறார் ஒய்.ஜி. மகேந்திரா. அவரது இசை திறமையை மக்கள் கொண்டாடுகின்றனர். எங்கு சென்றாலும் மரியாதையும் பாராட்டும் அவரைத் தொடர்ந்து வருகின்றன.
ஆனால், அந்த புகழே அவரது மகனான ராஜ் ஐயப்பாவின் மனதில் ஒரு காயமாக மாறுகிறது. “என் பெயருக்காக யாரும் என்னை அறியவில்லை; என் தந்தையின் மகனாக மட்டுமே பார்க்கிறார்கள்” என்ற ஏக்கம் நாளடைவில் வெறுப்பாக மாறுகிறது.
தனக்கென ஒரு அடையாளத்தை உருவாக்க முடியாத விரக்தியில் வாழும் ராஜ் ஐயப்பா, தந்தையின் மீதான கோபத்தை வெளிப்படையாக காட்டத் தொடங்குகிறார். மகனின் இந்த மாற்றத்தை கண்டு மனதளவில் உடைந்து போகிறார் ஒய்.ஜி. மகேந்திரா.
இந்நிலையில், ரம்யா பாண்டியனை காதலித்து திருமணம் செய்து கொள்கிறார் ராஜ் ஐயப்பா. ஆனால் குடும்பத்தில் நிலவும் இந்த மனக்கசப்பு, திருமணத்திற்குப் பிறகும் தொடர்கிறது. ஒரு கட்டத்தில் குடும்ப உறவுகளும், அன்பும், மரியாதையும் சோதனைக்கு உள்ளாகின்றன.
இந்த பிரச்சனைகள் எப்படி தீர்கின்றன? தந்தை-மகன் உறவு மீண்டும் இணைகிறதா? இசை மற்றும் வாழ்க்கை அவர்களுக்கு என்ன பாடம் கற்பிக்கிறது? என்பதே படத்தின் மீதிக்கதை.
ஒய்.ஜி. மகேந்திரா இந்த படத்தின் உயிராக திகழ்கிறார். ஒரு புகழ்பெற்ற கலைஞனாகவும், மகனின் அன்பிற்காக ஏங்கும் தந்தையாகவும் அவரது நடிப்பு மனதை நெகிழ வைக்கிறது. குறிப்பாக உணர்ச்சிகரமான காட்சிகளில் அவர் வெளிப்படுத்தும் வலி பார்வையாளர்களை மிகவும் உணர்வு ரீதியாக பாதிக்கும்படியாக இருந்தது.
சுகாசினி மணிரத்னம், குடும்பத்தின் தூணாக நிற்கும் மனைவியாக அமைதியான ஆனால் வலுவான நடிப்பை வழங்கியுள்ளார். கணவர் மற்றும் மகனுக்கு இடையில் சிக்கித் தவிக்கும் தாயின் உணர்வுகளை இயல்பாக வெளிப்படுத்துகிறார்.
ராஜ் ஐயப்பா, உள்ளுக்குள் கொதிக்கும் இளைஞனின் மனநிலையை நன்றாக பிரதிபலித்துள்ளார். தந்தையின் நிழலில் வாழும் ஒரு மகனின் மன அழுத்தத்தையும், அடையாளத்திற்கான போராட்டத்தையும் சிறப்பாக வெளிப்படுத்தியுள்ளார்.
ரம்யா பாண்டியன் தனது கதாபாத்திரத்திற்கு தேவையான நடிப்பை வழங்கியுள்ளார். குடும்பத்தில் ஏற்படும் மோதல்களுக்கு மத்தியில் தனது இருப்பை உணர்த்துகிறார்.
சத்யராஜ், சமுத்திரக்கனி, தலைவாசல் விஜய் உள்ளிட்ட அனுபவம் வாய்ந்த நடிகர்கள் கதைக்கு தேவையான வலுவை சேர்த்துள்ளனர்.
தேனிசை தென்றல் தேவாவின் இசை படத்திற்கு மிகப்பெரிய பலமாக அமைந்துள்ளது. குறிப்பாக சங்கீதம் சார்ந்த காட்சிகளில் அவரது இசை கதையின் உணர்வுகளை மேலும் உயர்த்துகிறது.
ஒளிப்பதிவாளர் சஞ்சய் பி.எல், இசை மற்றும் குடும்ப உணர்வுகள் கலந்த காட்சிகளை அழகாக பதிவு செய்துள்ளார். ரிச்சர்டின் படத்தொகுப்பு கதையின் ஓட்டத்தை சீராக நகர்த்த உதவுகிறது.
இயக்குநர் சுரேஷ் கிருஷ்ணா, குடும்ப உறவுகளின் ஆழத்தையும், தலைமுறைகளுக்கு இடையிலான மனநிலைகளையும் உணர்வுப்பூர்வமாக காட்சிப்படுத்தியுள்ளார். புகழ், அடையாளம், அன்பு, அங்கீகாரம் ஆகியவற்றுக்கிடையேயான போராட்டத்தை யதார்த்தமாக பதிவு செய்திருப்பது படத்தின் சிறப்பு. படம் சற்று நாடகத்தன்மையாக இருந்ததை மட்டும் சற்று கவனித்திருந்திருக்கலாம். பல நடிகர்களை இன்னும் நடிக்க வைத்து காட்சிகளை சிதறவிட்டிருக்கலாம்.. திரைக்கதையிலும் வேகம் காட்டியிருக்கலாம்..
ஒய்.ஜி. மகேந்திராவின் சிறப்பான நடிப்பு, தந்தை – மகன் உறவை மையமாகக் கொண்ட உணர்வுப்பூர்வமான கதை, தேவாவின் இசை உள்ளிட்டவை படத்திற்கு பலமாக இருக்கிறது.
“சாருகேஸி” வெறும் குடும்ப திரைப்படம் அல்ல; புகழின் பின்னால் மறைந்திருக்கும் தனிமையையும், அன்புக்காக ஏங்கும் ஒரு தந்தையின் மனதையும் பேசும் உணர்வுப்பூர்வமான படைப்பு.
