இந்தியா முழுவதும் தனது மருத்துவக் கட்டமைப்பை பெரிய அளவில் விரிவுபடுத்த திட்டமிட்டுள்ள அப்போலோ மருத்துவமனைகள், உபாசனா காமினேனி கொனிடெலாவுக்கு திட்டங்கள் தொடர்பான முக்கிய பொறுப்பை வழங்கியுள்ளது. புதிய மருத்துவமனைகளை உருவாக்குதல், ஏற்கனவே செயல்பட்டு வரும் மருத்துவமனைகளை விரிவுபடுத்துதல் மற்றும் நோயாளிகளுக்கான வசதிகளை மேம்படுத்துதல் உள்ளிட்ட பணிகளில் அவர் கவனம் செலுத்த உள்ளார்.
அப்போலோ மருத்துவமனைகளின் தற்போதைய விரிவாக்கத் திட்டத்தின் மதிப்பிடப்பட்ட மொத்த திட்டச் செலவு சுமார் ₹8,600 கோடி என தெரிவிக்கப்பட்டுள்ளது. இதில் ஏற்கனவே செயல்பட்டு வரும் மருத்துவமனைகளில் மேற்கொள்ளப்படும் சுமார் ₹1,565 கோடி மதிப்பிலான Brownfield Expansion Projects-ம் அடங்கும்.
உபாசனாவுக்கு புதிய பொறுப்பு
அப்போலோ குழுமத்தின் தலைமை நிர்வாகம், மருத்துவக் குழுக்கள் மற்றும் திட்டப் பங்குதாரர்களுடன் இணைந்து, இந்தியாவின் பல்வேறு பகுதிகளில் செயல்படுத்தப்படவுள்ள மருத்துவமனைத் திட்டங்களின் திட்டமிடல் மற்றும் செயல்படுத்தும் பணிகளில் உபாசனா காமினேனி கொனிடெலா கவனம் செலுத்த உள்ளார்.
புதிய மருத்துவமனைகளை அமைப்பதுடன், ஏற்கனவே செயல்பட்டு வரும் மருத்துவமனைகளின் விரிவாக்கம் மற்றும் மேம்பாடு, நோயாளிகள் பயன்படுத்தும் பகுதிகளில் ஒரே மாதிரியான வடிவமைப்புத் தரத்தை உருவாக்குதல் உள்ளிட்டவை முக்கிய பணிகளாக இடம்பெறுகின்றன.
நோயாளிகள் மருத்துவமனைக்குள் எளிதாகச் சென்று வருவதற்கான வழிகள், தெளிவான வழிகாட்டிப் பலகைகள், மருத்துவப் பிரிவுகளின் திறமையான அமைப்பு மற்றும் நோயாளிகளுடன் வரும் குடும்பத்தினருக்கும் வசதியான சூழலை ஏற்படுத்துவது போன்ற அம்சங்களுக்கும் முக்கியத்துவம் அளிக்கப்பட உள்ளது.
வடிவமைப்பு முதல் மருத்துவமனை திறப்பு வரை
ஒரு மருத்துவமனையின் ஆரம்ப வடிவமைப்பு தொடங்கி அது முழுமையாக செயல்பாட்டுக்கு வரும் வரையிலான பல்வேறு கட்டங்களிலும் திட்டப் பணிகளை ஒருங்கிணைப்பதிலும் உபாசனா கவனம் செலுத்த உள்ளார்.
திட்ட மேலாண்மை நடைமுறைகளை வலுப்படுத்துதல், பணிகளின் முன்னேற்றம் குறித்த அறிக்கைகளை முறையாக உருவாக்குதல் மற்றும் பல்வேறு குழுக்களுக்கு இடையிலான ஒருங்கிணைப்பை மேம்படுத்துதல் ஆகியவையும் இதில் இடம்பெறுகின்றன.
பல முக்கிய நகரங்களில் விரிவாக்கம்
விரிவாக்கத் திட்டத்தின் கீழ் ஹைதராபாத், டெல்லி NCR, சென்னை, மும்பை, பெங்களூரு உள்ளிட்ட பெருநகரங்களுடன், லக்னோ, வாரணாசி, இந்தோர், குவாஹாத்தி மற்றும் ராஞ்சி உள்ளிட்ட நகரங்களிலும் திட்டங்கள் செயல்படுத்தப்பட உள்ளதாக தெரிவிக்கப்பட்டுள்ளது.
உபாசனாவின் நேரடிப் பொறுப்பின் கீழ் எந்தெந்த திட்டங்கள் வரும், அவற்றுக்கு தனித்தனியாக எவ்வளவு முதலீடு ஒதுக்கப்படும் என்பது தொடர்பான விரிவான தகவல்கள் பின்னர் உறுதி செய்யப்படும்.
அப்போலோ ஏற்கனவே தனது மருத்துவமனை வலையமைப்பை விரிவுபடுத்தி வருகிறது. 2026 ஏப்ரலில் ஹைதராபாத் Financial District-ல் 400 படுக்கைகள் கொண்ட தனது 76வது மருத்துவமனையைத் திறந்ததாக நிறுவனம் தெரிவித்துள்ளது.
மருத்துவச் சேவைகளை எளிதாக அணுகுவதே நோக்கம்
இந்த விரிவாக்கத்தின் முக்கிய நோக்கங்களில் ஒன்று உயர்தர மருத்துவச் சேவைகளை அதிகமான மக்களுக்கு எளிதாகக் கொண்டு சேர்ப்பதாகும். மருத்துவமனை சிகிச்சையுடன் நோய்த் தடுப்பு மற்றும் ஆரம்ப நிலையிலேயே நோய்களைக் கண்டறிவதற்கான சேவைகளையும் ஒருங்கிணைப்பதில் கவனம் செலுத்தப்பட உள்ளது.
புதிய மருத்துவமனைகள் மற்றும் விரிவாக்கங்கள் மூலம் மருத்துவர்கள், செவிலியர்கள், மருத்துவத் தொழில்நுட்ப வல்லுநர்கள் உள்ளிட்ட பல்வேறு துறைகளைச் சேர்ந்தவர்களுக்கு வேலைவாய்ப்புகள் உருவாகும் வாய்ப்பும் உள்ளது.
அப்போலோ தனது மருத்துவக் கட்டமைப்பில் தொழில்நுட்பம் மற்றும் நோயாளிகளை மையப்படுத்திய சேவைகளுக்கு தொடர்ந்து முக்கியத்துவம் அளித்து வருகிறது. அதன் சமீபத்திய ஹைதராபாத் மருத்துவமனையையும் technology-led, patient-centric healthcare அமைப்பாக நிறுவனம் விவரித்துள்ளது.
உபாசனா என்ன சொல்கிறார்?
தனது தாத்தாவும் அப்போலோ மருத்துவமனைகள் குழுமத்தின் நிறுவனருமான டாக்டர் பிரதாப் சி. ரெட்டி, உலகத் தரத்திலான மருத்துவச் சேவை இந்திய மக்களுக்கு எளிதாக கிடைக்க வேண்டும் என்ற நோக்கத்துடன் அப்போலோவை உருவாக்கியதாக உபாசனா தெரிவித்துள்ளார்.
மருத்துவமனைகளின் வடிவமைப்பு நோயாளிகளை மையமாகக் கொண்டதாக இருக்க வேண்டும் என்றும், நோயாளிகள் தங்களுக்குத் தேவையான இடத்தை குழப்பமின்றி அடையவும், குடும்பத்தினர் ஆதரவான சூழலை உணரவும், மருத்துவக் குழுவினர் திறம்பட பணியாற்றவும் வசதிகள் ஏற்படுத்தப்பட வேண்டும் என்றும் அவர் வலியுறுத்தியுள்ளார்.
இந்தியாவின் மருத்துவத் துறையின் தரம், அக்கறையுடன் கூடிய மருத்துவச் சேவை மற்றும் சிந்தனைமிக்க மருத்துவமனை வடிவமைப்பு ஆகியவற்றை ஒருங்கிணைத்து உலக அளவில் இந்தியாவின் மருத்துவத் திறனை வெளிப்படுத்துவதற்கான வாய்ப்பாக இந்த விரிவாக்கத்தை அவர் பார்க்கிறார்.
அப்போலோவின் அதிகாரப்பூர்வ Investor Relations பக்கத்திலும் FY2025-26 ஆண்டு அறிக்கை மற்றும் 2026 முதலீட்டாளர் ஆவணங்கள் தற்போது இடம்பெற்றுள்ளன.
