இந்தியாவின் முன்னணி ஓடிடி தளமான பிரைம் வீடியோவில், வரும் ஆகஸ்ட் 7 முதல் ‘வதந்தி சீசன் 2: தி மிஸ்டரி ஆஃப் மணி’ இணையத் தொடர் உலகம் முழுவதும் ஸ்ட்ரீமிங் செய்யப்படுகிறது. வால்வாட்சர் பிலிம்ஸ் நிறுவனம் சார்பில் தயாரிப்பாளர்கள் புஷ்கர் – காயத்ரி தயாரித்துள்ள இந்த தொடரை ஆண்ட்ரூ லூயிஸ் இயக்கியுள்ளார். இதில் நடிகர் சசிகுமார், கடமை தவறாத போலீஸ் அதிகாரி மூஸா ராசா என்ற மையக் கதாபாத்திரத்தில் நடித்துள்ளார்.
இந்த தொடரின் வெளியீட்டை முன்னிட்டு சென்னையில் நடைபெற்ற பத்திரிகையாளர் சந்திப்பில், சசிகுமார், யஷ்வந்த், அனகா மருதோரா, அபர்ணா தாஸ், விவேக் பிரசன்னா, ரேவதி சர்மா, அர்ஜுன் நந்தகுமார், இயக்குநர் ஆண்ட்ரூ லூயிஸ், தயாரிப்பாளர்கள் புஷ்கர்–காயத்ரி, இசையமைப்பாளர் சிமோன் கே. கிங் மற்றும் பிரைம் வீடியோ குழுவினர் கலந்து கொண்டனர்.
‘மூஸா ராசா’ கதாபாத்திரம் எங்களை ஈர்த்தது – புஷ்கர் & காயத்ரி
பத்திரிகையாளர்களிடம் பேசிய தயாரிப்பாளர்கள் புஷ்கர்–காயத்ரி, நீதிக்காக எந்த நிரபராதியும் தண்டிக்கப்படக் கூடாது என்ற கொள்கையுடன் செயல்படும் மூஸா ராசா என்ற போலீஸ் அதிகாரியின் கதையே முதலில் தங்களை ஈர்த்ததாக தெரிவித்தனர்.
மேலும், முதல் சீசனின் கதையை எழுதிக் கொண்டிருந்தபோதே இயக்குநர் ஆண்ட்ரூ லூயிஸ் இரண்டாம் சீசனுக்கான யோசனையையும் வைத்திருந்ததாகவும், மதுரையை மையமாகக் கொண்ட இந்தக் கதைக்காக பல மாதங்கள் அங்கு தங்கி மக்களின் வாழ்க்கை முறையை ஆய்வு செய்து திரைக்கதையை உருவாக்கிய விதம் தங்களை ஆச்சரியப்படுத்தியதாகவும் கூறினர்.
“புத்திசாலித்தனமான விசாரணை தான் கதையின் பலம்”
வழக்கமான ஆக்ஷன் போலீஸ் கதைகளில் இருந்து விலகி, ஒரு நிரபராதியை காப்பாற்ற போராடும் போலீஸ் அதிகாரியின் பார்வையில் கதை நகரும் வகையில் இந்த இணையத் தொடர் உருவாக்கப்பட்டுள்ளதாக தயாரிப்பாளர்கள் குறிப்பிட்டனர்.
இயக்குநர் ஆண்ட்ரூ லூயிஸ்
“முதல் சீசன் இயல்பாக வெற்றி பெற்றது. ஆனால் அதைவிட பெரிய எதிர்பார்ப்புகளுடன் இரண்டாவது சீசனை உருவாக்குவது மிகப்பெரிய சவாலாக இருந்தது. ஒவ்வொரு திருத்தத்திற்கும் புஷ்கர்–காயத்ரி தொடர்ந்து ஊக்கம் அளித்தனர்.
மதுரை, காரைக்குடி, ராமநாதபுரம், திருச்சி உள்ளிட்ட பகுதிகளில் தொடர்ந்து 43 நாட்கள் படப்பிடிப்பு நடைபெற்றது. ஒவ்வொரு காட்சியிலும் அந்த பகுதியின் இயல்பான வாழ்க்கை முறையை பதிவு செய்ய முயன்றோம். வதந்தி சீசன் 1 வெற்றிக்கு காரணமான எஸ்.ஜே. சூர்யாவுக்கும் நன்றியை தெரிவித்துக் கொள்கிறேன்” என்றார்.
சசிகுமார்
“முதலில் தலைப்பை கேட்டபோது நான் ‘மணி’ கதாபாத்திரத்தில் நடிப்பேன் என நினைத்தேன். ஆனால் இயக்குநர் என்னை போலீஸ் அதிகாரி ‘மூஸா ராசா’வாக நினைத்து கதையை எழுதியிருந்தார். அதுவே என்னை மிகவும் கவர்ந்தது.
வழக்கமான போலீஸ் ஹீரோ போல இல்லாமல், மதுரையில் பணியாற்றும் ஒரு சாதாரண காவல் அதிகாரியின் இயல்பான வாழ்க்கையை வெளிப்படுத்த வேண்டும் என்று இயக்குநர் கூறினார். இந்த கதாபாத்திரத்தில் நடித்த அனுபவம் எனக்கு புதிய பரிமாணத்தை கொடுத்துள்ளது” என்று பகிர்ந்தார்.
நடிகர்கள்
விவேக் பிரசன்னா, யஷ்வந்த், அபர்ணா தாஸ் மற்றும் அனகா மருதோரா ஆகியோர், இயக்குநர் ஆண்ட்ரூ லூயிஸின் திரைக்கதை, தயாரிப்பாளர்களின் ஆதரவு மற்றும் படப்பிடிப்பு அனுபவங்கள் குறித்து தங்களது மகிழ்ச்சியை பகிர்ந்து கொண்டனர்.
இசை
இசையமைப்பாளர் சிமோன் கே. கிங், “முதல் சீசனுக்கும் இரண்டாவது சீசனுக்கும் முற்றிலும் வேறுபட்ட இசை அனுபவத்தை வழங்கியுள்ளோம். இந்த முறை இரண்டு பாடல்களும் இடம்பெற்றுள்ளன. அவை கதையுடன் ஒன்றிணைந்து ரசிகர்களுக்கு புதிய அனுபவத்தை வழங்கும்” என்றார்.
உலகம் முழுவதும் ஸ்ட்ரீமிங்
‘வதந்தி சீசன் 2: தி மிஸ்டரி ஆஃப் மணி’ இணையத் தொடர் ஆகஸ்ட் 7 முதல் பிரைம் வீடியோவில் வெளியாகிறது. தமிழுடன் தெலுங்கு, இந்தி உள்ளிட்ட மொழிகளில் டப்பிங் செய்யப்பட்டும், 15-க்கும் மேற்பட்ட மொழிகளில் சப்டைட்டில்களுடன், இந்தியா மட்டுமல்லாமல் உலகம் முழுவதும் 240-க்கும் மேற்பட்ட நாடுகள் மற்றும் பிராந்தியங்களில் பிரத்யேகமாக ஸ்ட்ரீமிங் செய்யப்படுகிறது.
