அசோக் செல்வன் – ப்ரீத்தி முகுந்தன் நடிப்பில், இயக்குநர் ஆர். கார்த்திகேயன் இயக்கத்தில் வெளியான ‘அன்பில் அவன்’ திரைப்படத்தின் வெற்றியைத் தொடர்ந்து, படக்குழுவினர் பத்திரிகையாளர்களைச் சந்தித்து நன்றி தெரிவித்தனர்.
ஐங்கரன் இன்டர்நேஷனல் மற்றும் ஹேப்பி ஹை பிக்சர்ஸ் இணைந்து தயாரித்த இப்படம், அக்டோபர் 2ஆம் தேதி திரையரங்குகளில் வெளியானது. காதல், ஆக்ஷன் மற்றும் திரில்லர் அம்சங்களுடன் உருவான இப்படத்திற்கு ரசிகர்களிடையே நல்ல வரவேற்பு கிடைத்து வருவதாகப் படக்குழுவினர் தெரிவித்தனர்.
நிகழ்ச்சியில் பேசிய ஹேப்பி ஹை பிக்சர்ஸ் நிறுவனர் அபிநயா செல்வம், ‘அன்பில் அவன்’ படத்தை இந்தியில் ரீமேக் செய்வதற்கான பேச்சுவார்த்தைகள் நடைபெற்று வருவதாகவும், தெலுங்கிலும் ரீமேக் செய்யத் திட்டமிட்டுள்ளதாகவும் தெரிவித்தார்.
இயக்குநர் கார்த்திகேயன் பேசுகையில், படம் தயாரிப்பாளர்களுக்கு லாபம் ஈட்டித் தந்ததுடன், ரசிகர்களிடமும் நல்ல வரவேற்பைப் பெற்றிருப்பது மகிழ்ச்சியளிப்பதாகக் கூறினார்.
நடிகர் அசோக் செல்வன், கடும் போட்டிகளுக்கு மத்தியில் வெளியான இப்படம் லாபகரமான நிலையை எட்டியுள்ளதாகவும், படத்தின் வெற்றிக்கு ஆதரவளித்த ரசிகர்கள் மற்றும் ஊடகத்தினருக்கு நன்றி தெரிவிப்பதாகவும் கூறினார்.
நடிகை ப்ரீத்தி முகுந்தன், ரசிகர்களிடமிருந்து கிடைத்த உணர்வுபூர்வமான பாராட்டுகள் தனக்கு மிகுந்த மகிழ்ச்சியை அளித்ததாகத் தெரிவித்தார்.
இந்த நிகழ்ச்சியில் நடிகர்கள் கதிர் பாலு, மஹா டெல்லி கணேஷ், ஆகாஷ் உள்ளிட்ட படக்குழுவினர் கலந்துகொண்டு தங்களது அனுபவங்களைப் பகிர்ந்துகொண்டனர்.
