தமிழ் சினிமாவில் வித்தியாசமான முயற்சிகள் தொடர்ந்து ரசிகர்களின் கவனத்தை ஈர்த்து வரும் நிலையில், தனி ஒரு மனிதனின் முழுமையான உழைப்பில் உருவாகியுள்ள ‘ONE MAN’ திரைப்படம் வரும் ஆகஸ்ட் 21ஆம் தேதி உலகம் முழுவதும் திரையரங்குகளில் வெளியாகிறது.
சங்ககிரி ராஜ்குமாரின் பெரும் முயற்சியில் உருவாகியுள்ள இப்படம், ஒரு திரைப்படத்திற்குத் தேவையான 70-க்கும் மேற்பட்ட துறை சார்ந்த பணிகளை எந்தவித உதவியாளர்களின் உதவியும் இல்லாமல், தொடக்கம் முதல் இறுதிவரை ஒரே மனிதராக செய்து முடித்துள்ள திரைப்படம் என்ற வித்தியாசமான அடையாளத்தை பெற்றுள்ளது.
70-க்கும் மேற்பட்ட பணிகள்… ஒரே மனிதர்!
பொதுவாக ஒரு திரைப்படத்தின் ஒவ்வொரு துறையிலும் பல்வேறு கலைஞர்கள் மற்றும் உதவியாளர்கள் இணைந்து பணியாற்றுவது வழக்கம். ஆனால் ‘ONE MAN’ திரைப்படத்தில், 70-க்கும் மேற்பட்ட பணிகளை சங்ககிரி ராஜ்குமாரே தனி ஒருவராக மேற்கொண்டுள்ளார்.
இதனால் இப்படம் திரைப்பட ஆர்வலர்கள் மத்தியில் ஆரம்பத்திலேயே கவனம் பெற்றுள்ளது.
ஆனால், ‘ஒரே மனிதனால் உருவாக்கப்பட்ட திரைப்படம்’ என்பதால் இது திரைப்பட விழாக்களுக்கான பரிசோதனை முயற்சியாக மட்டுமே இருக்கும் என்று நினைத்துவிட வேண்டாம் என்கிறது படக்குழு.
ஆக்ஷனுக்கும் பஞ்சமில்லை!
‘ONE MAN’ திரைப்படத்தில் பிரம்மாண்டமான ஆக்ஷன் காட்சிகளும் இடம்பெற்றுள்ளதாக தெரிவிக்கப்பட்டுள்ளது.
பரபரப்பான ஹெலிகாப்டர் சேசிங், ஒரு ரயில் மற்றொரு ரயிலில் மோதும் விபத்துக் காட்சி, அமெரிக்காவில் படமாக்கப்பட்ட கார் சேசிங் மற்றும் மிகப்பெரிய அருவியில் குதித்து ஐந்து பேர் தப்பிக்கும் காட்சி என பல சுவாரஸ்யமான காட்சிகள் படத்தில் இடம்பெற்றுள்ளன.
ஒரு தனி மனிதனின் முயற்சியில் உருவான திரைப்படம் என்ற எல்லையைத் தாண்டி, ஆக்ஷன் திரைப்படங்களுக்கு இணையான காட்சிகளை உருவாக்கியிருப்பதாக படக்குழு தெரிவித்துள்ளது.
ஒரே நடிகர்… பல கதாபாத்திரங்கள்!
இப்படத்தின் மற்றொரு சுவாரஸ்யமான அம்சம், படத்தில் இடம்பெறும் அனைத்து கதாபாத்திரங்களிலும் சங்ககிரி ராஜ்குமாரே நடித்திருப்பது.
ஒரே நபர் பல்வேறு கதாபாத்திரங்களில் நடித்திருந்தாலும், படத்தைப் பார்க்கும்போது ஒவ்வொரு கதாபாத்திரமும் தனித்தனி மனிதர்களாகவே தோன்றும் வகையில் காட்சிகள் உருவாக்கப்பட்டுள்ளதாக கூறப்படுகிறது.
ஒரு கதாபாத்திரத்திடமிருந்து மற்றொரு கதாபாத்திரம் எப்படி தப்பிக்கும்? ஒருவரால் மற்றொருவருக்கு என்ன பிரச்சனை ஏற்படும்? என்ற கேள்விகளை எழுப்பும் வகையில் திரைக்கதை அமைக்கப்பட்டுள்ளதாகவும் படக்குழு தெரிவிக்கிறது.
படப்பிடிப்பையும் பதிவு செய்த சங்ககிரி ராஜ்குமார்!
‘ONE MAN’ திரைப்படத்தின் உருவாக்கத்தில் மற்றொரு ஆச்சரியமான முயற்சியையும் சங்ககிரி ராஜ்குமார் மேற்கொண்டுள்ளார்.
படத்தின் ஒவ்வொரு காட்சியையும் தான் எவ்வாறு படமாக்கினார் என்பதை மற்றொரு கேமராவின் மூலம் முழுமையாக பதிவு செய்து வைத்துள்ளார். இதன் மூலம் திரைப்படத்தை உருவாக்கிய விதமும் தனித்துவமான முயற்சியாக அமைந்துள்ளது.
சிறப்புக் காட்சியில் பாராட்டு
‘ONE MAN’ திரைப்படத்தின் சிறப்புக் காட்சியைப் பார்த்த திரைத்துறை பிரமுகர்கள், தனி மனித உழைப்பை மட்டுமல்லாமல், கதை, திரைக்கதை மற்றும் காட்சி அமைப்பும் சுவாரஸ்யமாக இருப்பதாக பாராட்டியுள்ளதாக படக்குழு தெரிவித்துள்ளது.
குறிப்பாக, அடுத்து என்ன நடக்கும் என்ற எதிர்பார்ப்பை உருவாக்கும் வகையில் காட்சிகள் அமைந்திருப்பதாகவும், ஒரே மனிதராக இருந்து இத்தகைய முயற்சியை மேற்கொண்டிருப்பது ஆச்சரியத்தை ஏற்படுத்துவதாகவும் பாராட்டுகள் கிடைத்துள்ளன.
பெரிய தயாரிப்பு நிறுவனங்கள் மற்றும் முன்னணி நடிகர்களின் திரைப்படங்களுக்கு கிடைக்கும் வரவேற்பைப் போலவே, ஒரு தனி மனிதனாகவும், தமிழனாகவும் மேற்கொண்ட இந்த முயற்சியை ரசிகர்கள் கொண்டாடுவார்கள் என்ற நம்பிக்கையை இயக்குநர் சங்ககிரி ராஜ்குமார் தெரிவித்துள்ளார்.
வித்தியாசமான உருவாக்கம், பல்வேறு கதாபாத்திரங்கள், ஆக்ஷன் காட்சிகள் மற்றும் ஒரே மனிதனின் முழுமையான உழைப்பு என பல்வேறு சிறப்பம்சங்களுடன் உருவாகியுள்ள ‘ONE MAN’ திரைப்படம் வரும் ஆகஸ்ட் 21ஆம் தேதி உலகம் முழுவதும் திரையரங்குகளில் வெளியாகிறது.
