தமிழ் சினிமாவின் உச்ச நடிகரான விஜய்க்கு தமிழகத்தில் மட்டும் அல்ல இந்தியாவையும் தாண்டி வெளிநாடுகளிலும் ஏராளமான ரசிகர்கள் இருக்கிறார்கள். பொதுமக்களுக்கு பல்வேறு உதவிகளை செய்வதோடு, பல சமூக பணிகளையும் மேற்கொண்டு வருகிறார்கள் இவர்கள்.
கனடா நாட்டில் தளபதி விஜய் மக்கள் இயக்கம் பல்வேறு பகுதிகளில் இயங்கி வருவதோடு, கனடா தலைமை தளபதி விஜய் மக்கள் இயக்கம் சார்பாக பல்வேறு சமூக பணிகள் மேற்கொள்ளப்பட்டு வருகிறது. கனடா தளபதி விஜய் மக்கள் இயக்கத்தில் முக்கிய பொறுப்பில் இருப்பவர், பிரபல தமிழ் சினிமா இசையமைப்பாளர் பரத்வாஜ் அவர்களின் மருமகன் கார்த்திக்.
கார்த்திக் உள்ளிட்ட கனடா தலைமை விஜய் மக்கள் இயக்கத்தினர், தங்களது இயக்கம் சார்பாக அந்நாட்டில் பல ஆக்கப்பூர்வமான பணிகளையும், மக்களுக்கான பணிகளையும் மேற்கொண்டு வருகிறார்கள்.
இந்த நிலையில், கடந்த அக்டோபர் 1 ஆம் தேதி இந்தியாவில் தேசிய இரத்த தானம் தினம் கடைபிடிக்கப்பட்டது. இந்த தினத்தில், கனடா தலைமை தளபதி விஜய் மக்கள் இயக்கம் சார்பாக கனடாவின் பர்லிங்டன்னில் உள்ள கனடா இரத்த சேவைகள் (Canadian Blood Services ) முகாமில் இரத்ததானம் செய்யப்பட்டது.
விஜய் ரசிகர்களின் இத்தகைய சமூக சேவையை அந்நாட்டில் இருக்கும் தமிழர்கள் மட்டும் இன்றி அந்நாட்டை சேர்ந்தவர்களும் வெகுவாக பாராட்டி வருவதால், நடிகர் விஜய்யின் வாழ்த்துகளோடு இதுபோன்ற சமூக பணிகளை தொடர்ந்து செய்வோம் என்றும் கனடா தலமை தளபதி விஜய் மக்கள் இயக்கத்தில் முக்கிய பொறுப்பில் உள்ள கார்த்திக் அவர்கள் தெரிவித்துள்ளார்.