இந்தியாவின் முன்னணி ஓடிடி தளமான Prime Video, விமர்சகர்களின் பாராட்டைப் பெற்ற தமிழ் ஒரிஜினல் சஸ்பென்ஸ் திரில்லர் தொடரான **’வதந்தி’**யின் இரண்டாவது சீசனான ‘வதந்தி சீசன் 2 – தி மிஸ்டரி ஆஃப் மணி’ வரும் ஆகஸ்ட் 7 முதல் உலகம் முழுவதும் வெளியாகும் என அதிகாரப்பூர்வமாக அறிவித்துள்ளது.
ஆண்ட்ரூ லூயிஸ் உருவாக்கி, எழுதி, இயக்கியுள்ள இந்த 8 எபிசோடுகள் கொண்ட சீரிஸை, வால்வாட்சர் ஃபிலிம்ஸ் நிறுவனத்தின் சார்பில் புஷ்கர் – காயத்ரி கிரியேட்டிவ் தயாரிப்பாளர்களாக உருவாக்கியுள்ளனர். குற்றவுணர்வு, மறைக்கப்பட்ட ரகசியங்கள், வதந்திகள் மற்றும் மீட்சியை மையமாகக் கொண்ட இந்த புதிய சீசன், பரபரப்பான மர்மக் கதையுடன் ரசிகர்களை கவர தயாராகியுள்ளது.
இந்த தொடரில் எம். சசிகுமார், நேர்மையும் விடாமுயற்சியும் கொண்ட காவல் அதிகாரியான எஸ்.ஐ. மூசா ரஸா கதாபாத்திரத்தில் நடித்துள்ளார். அவருடன் யஷ்வந்த், அனகா மருதோரா, அபர்ணா தாஸ், விவேக் பிரசன்னா, ரேவதி சர்மா மற்றும் அர்ஜுன் நந்தகுமார் ஆகியோர் முக்கிய கதாபாத்திரங்களில் நடித்துள்ளனர்.
மதுரை பின்னணியில் நகரும் மர்மம்
மதுரையின் கலாச்சாரப் பின்னணியையும், உலகப் புகழ்பெற்ற ஜல்லிக்கட்டு திருவிழாவின் துடிப்பையும் மையமாகக் கொண்டு உருவாகியுள்ள இந்த சீசன், ‘வதந்தி’ தொடரின் முக்கிய கருவான “வதந்தி Vs உண்மை” என்ற கருத்தை மேலும் ஆழமாக ஆராய்கிறது.
நெடுஞ்சாலை திட்டத்தின் தொடக்க விழாவின் போது கண்டெடுக்கப்படும் மனித எலும்புக்கூடு, பல ஆண்டுகளாக மறைக்கப்பட்ட மர்மத்தை வெளிச்சத்துக்கு கொண்டு வருகிறது. விசாரணையை முன்னெடுக்கும் எஸ்.ஐ. மூசா ரஸா, ‘மணி’ என்ற மர்மமான கைதியை நோக்கி செல்லும் அதிர்ச்சிகரமான தடயங்களை கண்டுபிடிக்கிறார். அரசியல் அழுத்தம், ஊடக பரபரப்பு மற்றும் மனித மனங்களின் பலவீனங்களுக்கு மத்தியில் உண்மையை கண்டுபிடிக்கும் அவரது பயணமே இந்த சீசனின் மையக்கதையாக அமைந்துள்ளது.
