இயக்குநர் சசி எழுதி இயக்கிய, நடிகர் விஜய் ஆண்டனி நடித்துள்ள உணர்வுபூர்வ குடும்பத் திரைப்படமான ‘நூறு சாமி’, ஆகஸ்ட் 7 முதல் தமிழ் ZEE5 OTT தளத்தில் தமிழ், தெலுங்கு, கன்னடம் மற்றும் மலையாள மொழிகளில் பிரத்தியேகமாக ஸ்ட்ரீமிங் ஆகிறது.
‘பிச்சைக்காரன்’ திரைப்படத்திற்குப் பிறகு சுமார் ஒரு தசாப்த இடைவெளிக்குப் பின்னர், விஜய் ஆண்டனி – சசி கூட்டணி மீண்டும் இணைந்துள்ளதால் இந்த திரைப்படம் ரசிகர்களிடையே பெரும் எதிர்பார்ப்பை உருவாக்கியுள்ளது. விஜய் ஆண்டனி ஃபிலிம் கார்ப்பரேஷன் சார்பில் விஜய் ஆண்டனி மற்றும் பாத்திமா விஜய் ஆண்டனி இணைந்து தயாரித்துள்ள இப்படம், திரையரங்குகளில் வெளியாகி விமர்சகர்களின் பாராட்டுகளையும் ரசிகர்களின் வரவேற்பையும் பெற்றது.
இந்த திரைப்படத்தில் விஜய் ஆண்டனி, ஸ்வாசிகா, அஜய் திஷன், லிஜோமோல் ஜோஸ், கருணாஸ், காவ்யா அனில், பாலாஜி சக்திவேல் மற்றும் அருள்தாஸ் உள்ளிட்டோர் முக்கிய கதாபாத்திரங்களில் நடித்துள்ளனர்.
உண்மை சம்பவங்களை அடிப்படையாகக் கொண்டு உருவாக்கப்பட்டுள்ள ‘நூறு சாமி’, தனது குடும்பத்திற்காக வாழ்நாள் முழுவதையும் அர்ப்பணித்த விதவைத் தாய் செல்வியின் வாழ்க்கையை மையமாகக் கொண்டது. வாழ்க்கையின் பிற்காலத்தில் மறுமணம் குறித்து அவர் எடுக்கும் முடிவும், அதை எதிர்கொள்ளும் சமூகத்தின் மனப்பான்மையும், அதற்கு உறுதுணையாக நிற்கும் மகனின் அன்பும் திரைப்படத்தின் மையக் கருத்தாக அமைந்துள்ளது.
வழக்கமான குடும்பக் கதைகளிலிருந்து மாறுபட்டு, தாயின் மகிழ்ச்சிக்காக அவளது வாழ்க்கைத் தேர்வை ஆதரிக்கும் மகனின் உணர்வுபூர்வமான உறவை இந்த திரைப்படம் அழகாக பதிவு செய்கிறது. தாய்மை, மனிதநேயம், இரண்டாவது வாய்ப்பு, சமூகக் கட்டுப்பாடுகள் மற்றும் குடும்ப உறவுகளின் மதிப்பு போன்ற கருத்துகளை மனதைத் தொடும் வகையில் சசி திரைக்கதையில் வடிவமைத்துள்ளார்.
திரைப்படத்தின் OTT வெளியீட்டை முன்னிட்டு இயக்குநர் சசி கூறுகையில், “நூறு சாமி உண்மையான வாழ்க்கை அனுபவங்களிலிருந்து உருவான கதை. வயது, சமூகக் கட்டுப்பாடுகள் எதுவாக இருந்தாலும், அன்பு மற்றும் மகிழ்ச்சியைத் தேர்வு செய்யும் உரிமையைப் பேசும் இந்தக் கதை இன்னும் அதிகமான குடும்பங்களை சென்றடைவது மகிழ்ச்சி அளிக்கிறது” என்றார்.
நடிகர் விஜய் ஆண்டனி கூறுகையில், “ஒவ்வொரு படத்திற்கும் ஒரு நோக்கம் இருக்கும். ஆனால் ‘நூறு சாமி’ அதன் உணர்வுகளால் எனக்கு மிகவும் சிறப்பானது. தாய்–மகன் உறவை மையமாகக் கொண்ட இந்தக் கதையுடன் அனைத்து குடும்பங்களும் இணைவார்கள் என்று நம்புகிறேன்” என்றார்.
மனதை நெகிழ வைக்கும் குடும்பக் கதைகளை விரும்பும் ரசிகர்களுக்கு, ‘நூறு சாமி’ ஒரு தவறவிடக் கூடாத திரைப்படமாக இருக்கும். ஆகஸ்ட் 7 முதல் தமிழ் ZEE5-ல் பிரத்தியேகமாகக் காணலாம்.
