
நடிப்பு: விஜய் ஆண்டனி, ப்ரீத்தி அஸ்ராணி, பேபி லிதன்யா, ஜென்சன் திவாகர், முருகானந்தம், அருவி மதன், பகவதி பெருமாள், வேட்டை முத்துக்குமார், லிஸ்ஸி ஆண்டனி, ஸ்ரீஜா ரவி, பிரவீனா மற்றும் பலர்.
தயாரிப்பு: பாத்திமா விஜய் ஆண்டனி
இசை: விஜய் ஆண்டனி
ஒளிப்பதிவு: ராஜீவ் ராஜேந்திரன்
இயக்கம்: மு. மாறன்
தனது மகள் தியா (பேபி லிதன்யா) மீது அளவுகடந்த பாசம் வைத்திருக்கும் தந்தை சூர்யா (விஜய் ஆண்டனி). எதிர்பாராத விதமாக ரவுடிகளால் அவரது உயிருக்கு ஆபத்து ஏற்பட, கைக்குழந்தையுடன் ஊரை விட்டு வெளியேறி ஊட்டியில் தஞ்சமடைகிறார்.
அங்கு தனது மகளை வளர்த்து பள்ளியில் படிக்க வைக்கும் சூர்யாவின் வாழ்க்கையில் மீண்டும் ஒரு பேரதிர்ச்சி ஏற்படுகிறது. மகளை உயிருக்கு ஆபத்தான நோய் தாக்குகிறது. தனது மகளைக் காப்பாற்ற சூர்யா எடுக்கும் முயற்சிகள் என்ன? அவரை ரவுடிகள் கொல்லத் துடிப்பதற்கான காரணம் என்ன? உண்மையில் தியா யாருடைய குழந்தை? என்பதே படத்தின் மீதிக்கதை.
விஜய் ஆண்டனி வழக்கமான தனது அமைதியான நடிப்புடன், மகளுக்காக எதையும் செய்யத் துணியும் பாசமிகு தந்தையாக சிறப்பாக நடித்திருக்கிறார். ஆரம்பத்தில் ஆக்ஷன் காட்சிகளில் அதிரடி காட்டுபவர், அடுத்தடுத்த காட்சிகளில் மகளின் மீது அன்பைப் பொழியும் தந்தையாக உணர்வுப்பூர்வமான நடிப்பை வெளிப்படுத்தியிருக்கிறார்.
குறிப்பாக மகளின் உயிருக்கு ஆபத்து ஏற்படும் தருணங்களில் அவரது தவிப்பும், மகளைக் காப்பாற்ற அவர் மேற்கொள்ளும் போராட்டங்களும் கதைக்கு பலம் சேர்க்கின்றன.
ப்ரீத்தி அஸ்ராணி ஊட்டியில் பள்ளி ஆசிரியையாக வருகிறார். விஜய் ஆண்டனி மீது காதல் கொள்ளும் அவர், அந்தக் காதலுக்காக தனது வேலையையே விட்டுவிடுகிறார். ஆனால் அவரது காதலை விஜய் ஆண்டனி ஏற்க மறுப்பதற்குப் பின்னால் இருக்கும் மர்மம் கதையில் சுவாரஸ்யத்தை ஏற்படுத்துகிறது. காதல் மற்றும் பாசம் கலந்த கதாபாத்திரத்தில் இயல்பான நடிப்பை வழங்கியிருக்கிறார்.
படத்தின் முக்கிய பலமாக இருப்பவர் பேபி லிதன்யா. தனது குழந்தைத்தனமான பேச்சு, குறும்புத்தனம், அப்பா மீதான பாசம் என ஒவ்வொரு காட்சியிலும் கவனம் ஈர்க்கிறார். குறிப்பாக சென்டிமென்ட் காட்சிகளில் தனது நடிப்பால் ரசிகர்களை நெகிழ வைக்கிறார்.
ஜென்சன் திவாகர், முருகானந்தம், அருவி மதன், பகவதி பெருமாள், வேட்டை முத்துக்குமார் உள்ளிட்ட மற்ற நடிகர்களும் தங்களுக்கு கொடுக்கப்பட்ட கதாபாத்திரங்களை நிறைவாக செய்திருக்கிறார்கள்.
விஜய் ஆண்டனியின் இசை படத்தின் உணர்வுப்பூர்வமான காட்சிகளுக்கு கூடுதல் பலம் சேர்த்திருக்கிறது. குறிப்பாக அப்பா மகள் பாசத்தை வெளிப்படுத்தும் காட்சிகளில் பின்னணி இசை சிறப்பாக அமைந்துள்ளது.
படத்தொகுப்பையும் விஜய் ஆண்டனியே கவனித்திருக்கிறார். முதல் பாதியில் சில காட்சிகள் மெதுவாக நகர்ந்தாலும், இரண்டாம் பாதியில் திரைக்கதையின் வேகத்தை அதிகரிக்க படத்தொகுப்பு உதவியிருக்கிறது.
ராஜீவ் ராஜேந்திரனின் ஒளிப்பதிவு ஊட்டியின் இயற்கை அழகை ரசிக்கும்படி காட்சிப்படுத்தியிருக்கிறது. மலைப்பாதைகள், பசுமையான சூழல் என ஒவ்வொரு காட்சியும் கண்களுக்கு விருந்தாக அமைந்திருக்கிறது.
தந்தை மகள் பாசத்தை மையமாக வைத்து அதனுடன் ஆக்ஷன், காதல், சென்டிமென்ட், சஸ்பென்ஸ் என பல அம்சங்களை இணைத்து படத்தை இயக்கியிருக்கிறார் மு. மாறன்.
படத்தின் ஆரம்பத்திலேயே அதிரடியான ஆக்ஷன் காட்சிகளுடன் கதையை தொடங்கும் இயக்குநர், அதன் பிறகு அப்பா மகள் பாசத்தை நோக்கி திரைக்கதையை நகர்த்துகிறார்.
முதல் பாதியில் தந்தை மகள் பாசம் மற்றும் காதல் காட்சிகளுக்கு அதிக முக்கியத்துவம் கொடுக்கப்பட்டிருப்பதால் சில இடங்களில் திரைக்கதை மெதுவாக நகர்கிறது. இதனால் பெரிய அளவில் விறுவிறுப்பு ஏற்படவில்லை.
ஆனால் இரண்டாம் பாதியில் கதை வேறு திசையில் பயணிக்கத் தொடங்குகிறது. குறிப்பாக நீதிமன்றக் காட்சிகள் தொடங்கிய பிறகு படத்தின் மீதான எதிர்பார்ப்பு அதிகரிக்கிறது.
கிளைமாக்ஸ் நெருங்க நெருங்க அடுத்தடுத்து வெளிவரும் உண்மைகளும், எதிர்பாராத திருப்பங்களும் ரசிகர்களை இருக்கையின் நுனிக்கே கொண்டு வருகின்றன. குழந்தையின் பின்னணியில் மறைந்திருக்கும் மர்மத்தை இறுதிவரை சஸ்பென்ஸாக வைத்திருப்பது இயக்குநரின் புத்திசாலித்தனம்.
அதே நேரத்தில் முதல் பாதியிலும் திரைக்கதையை இன்னும் சுவாரஸ்யமாக அமைத்திருந்தால் படம் கூடுதல் விறுவிறுப்புடன் இருந்திருக்கும்.
பிளஸ்
விஜய் ஆண்டனி மற்றும் பேபி லிதன்யாவின் உணர்வுப்பூர்வமான நடிப்பு.
தந்தை மகள் பாசத்தை மையமாகக் கொண்ட கதைக்களம்.
இரண்டாம் பாதியில் வரும் சஸ்பென்ஸ் மற்றும் எதிர்பாராத திருப்பங்கள்.
பின்னணி இசை மற்றும் ஊட்டியின் அழகை பதிவு செய்த ஒளிப்பதிவு.
பரபரப்பான கிளைமாக்ஸ்.
மைனஸ்
முதல் பாதியில் மெதுவாக நகரும் திரைக்கதை.
சில காதல் மற்றும் சென்டிமென்ட் காட்சிகளின் நீளம்.
- ஆரம்பத்திலேயே கூடுதல் விறுவிறுப்பை ஏற்படுத்தியிருக்கலாம்.
விஜய் ஆண்டனி நடிப்பு இன்னும் இயற்கையாக கதையோடு ஒன்றியிருந்திருக்கலாம்…
‘அப்பா குட்டி’ திரைப்படம் தந்தை மகள் பாசத்தை அழுத்தமாகப் பதிவு செய்யும் ஒரு உணர்வுப்பூர்வமான படைப்பு. முதல் பாதியில் சற்று பொறுமையைச் சோதித்தாலும், இரண்டாம் பாதியில் வரும் எதிர்பாராத திருப்பங்களும், கிளைமாக்ஸ் காட்சிகளும் படத்தை சுவாரஸ்யமாக மாற்றுகின்றன.
விஜய் ஆண்டனியின் நடிப்பு, பேபி லிதன்யாவின் குறும்புத்தனம், தந்தை மகள் பாசம் ஆகியவை படத்திற்கு மிகப்பெரிய பலமாக அமைந்திருக்கின்றன.





