காதல் என்பது ஒருவரை தேடிச் சென்று அடைவது மட்டுமல்ல… சில நேரங்களில் வாழ்க்கையில் எதிர்பாராத தருணத்தில் நுழையும் ஒருவர், நம்முடைய கடந்தகால காயங்களை மறக்கச் செய்து புதிய வாழ்க்கையையும் கொடுக்கலாம். அப்படியொரு உறவையும், இரண்டு மனிதர்களின் உணர்வுகளையும் மையமாக வைத்து உருவாகியிருக்கும் திரைப்படம்தான் ‘ஏன் என்னை ஏதோ செய்தாய்’.
டி. ஆண்டனி எழுதி, இயக்கி, எடிட்டிங் செய்திருப்பதோடு படத்தின் நாயகனாகவும் நடித்துள்ளார். அவருக்கு ஜோடியாக மதுமிதா தாஸ் நடித்துள்ளார். ஜீவா ரவி, ரெஜின் ரோஸ், நவ்யா சுஜி உள்ளிட்டோர் முக்கிய கதாபாத்திரங்களில் நடித்துள்ளனர். ஆண்டனிஸ் அட்லியர் நிறுவனம் சார்பில் டி. ஆண்டனியே இப்படத்தை தயாரித்துள்ளார்.
கடந்த காலத்தில் தனக்கு ஏற்பட்ட கசப்பான அனுபவத்தால் காதல், திருமணம், குடும்ப வாழ்க்கை என அனைத்தின் மீதும் நம்பிக்கையை இழந்து தனிமையில் வாழ்ந்து வருகிறார் ஆண்டனி. புகை, மது என நாட்களை நகர்த்தி வருகிறார்.
அப்படியொரு சூழலில் விலைமாதுவாக அவரது வீட்டிற்கு வருகிறார் மதுமிதா தாஸ்.
சாதாரண சந்திப்பாக தொடங்கும் அந்த இரவு, இருவருக்கும் இடையேயான நீண்ட உரையாடலால் வேறு ஒரு திசைக்கு செல்கிறது. மதுமிதாவின் அழகு மட்டுமல்லாமல் அவரது பேச்சும் அணுகுமுறையும் ஆண்டனியை ஈர்க்கிறது.
இதனால் மறுநாளும் அவரை சந்திக்க விரும்புகிறார். ஒரு சந்திப்பு இரண்டு சந்திப்புகளாகி, அது தொடர்ந்து கொண்டே செல்கிறது. உடல்ரீதியான தேவையைத் தாண்டி இருவருக்கும் இடையே புரிதலும் நெருக்கமும் உருவாக ஆரம்பிக்கிறது.
ஒரு கட்டத்தில் ஆண்டனியின் அன்றாட வாழ்க்கையில் தவிர்க்க முடியாத நபராக மாறுகிறார் மதுமிதா.
அப்போது திடீரென இரண்டு நாட்கள் எந்த தகவலும் இல்லாமல் காணாமல் போகிறார் அவர். அந்த இரண்டு நாட்களில்தான் மதுமிதா தனது வாழ்க்கையில் எந்த அளவுக்கு முக்கியமானவராக மாறியிருக்கிறார் என்பதை ஆண்டனி உணர்கிறார்.
மீண்டும் வரும் மதுமிதா, தனது வாழ்க்கையில் மறைத்து வைத்திருந்த உண்மைகளை அவரிடம் பகிர்ந்து கொள்கிறார். தனக்கு ஒரு குழந்தை இருப்பதாகவும், சிங்கிள் மதராக குழந்தையை வளர்த்து வருவதாகவும் கூறுவதோடு தனது கடந்தகால வாழ்க்கையில் சந்தித்த வலிகளையும் பகிர்ந்து கொள்கிறார்.
இருவருமே கடந்த காலத்தில் காயங்களை சுமந்து கொண்டிருப்பவர்கள். அந்த காயங்களை மறந்து புதிய வாழ்க்கையை ஒன்றாக தொடங்க முடிவு செய்கிறார்கள்.
ஆனால் வாழ்க்கை அவர்கள் நினைத்தது போல் எளிதாக நகரவில்லை.
இருவருக்கும் இடையே ஏற்படும் கருத்து வேறுபாடு அவர்களை பிரிவை நோக்கி தள்ளுகிறது. அந்தப் பிரிவுக்குப் பிறகு இருவரது வாழ்க்கையும் என்ன ஆனது? மீண்டும் ஒன்று சேர்ந்தார்களா? அவர்களின் காதல் வென்றதா? என்பதுதான் படத்தின் மீதிக்கதை.
நாயகன், இயக்குநர், எழுத்தாளர், எடிட்டர், தயாரிப்பாளர் என பல பொறுப்புகளை ஒரே நேரத்தில் ஏற்றிருக்கிறார் டி. ஆண்டனி. இத்தனை பொறுப்புகள் இருந்தாலும் நடிகராக தனது கதாபாத்திரத்தை இயல்பாக கொண்டு செல்ல முயற்சி செய்திருக்கிறார்.
முதல் படம் என்ற தயக்கம் பெரிதாக தெரியாத அளவுக்கு அவரது நடிப்பு அமைந்திருக்கிறது. குறிப்பாக காதல், கோபம், சிரிப்பு, ஏக்கம் என வெவ்வேறு உணர்வுகளை வெளிப்படுத்தும் காட்சிகளில் கவனம் பெறுகிறார்.
தனிமையில் இருக்கும் மனிதன் ஒருவரின் வருகையால் கொஞ்சம் கொஞ்சமாக மாறுவதையும், அந்த நபர் திடீரென இல்லாமல் போகும்போது ஏற்படும் தவிப்பையும் இயல்பாக வெளிப்படுத்தியிருக்கிறார்.
இயக்குநராகவும் கதையை அதிகமான ஆர்ப்பாட்டங்கள் இல்லாமல், கதாபாத்திரங்களின் உணர்வுகளை முன்னிறுத்தி நகர்த்தியிருக்கிறார்.
படத்திற்கு பெரிய பலமாக இருப்பவர் மதுமிதா தாஸ்.
கதாபாத்திரத்திற்கு தேவையான தோற்றம் மட்டுமல்லாமல், காதல், சிரிப்பு, வலி, ஏக்கம் என பல்வேறு உணர்வுகளையும் அழகாக வெளிப்படுத்தியிருக்கிறார்.
குறிப்பாக ஆண்டனியுடனான உரையாடல் காட்சிகளில் இருவருக்கும் இடையேயான கெமிஸ்ட்ரி இயல்பாக அமைந்துள்ளது. தனது கடந்த காலத்தைப் பற்றி வெளிப்படுத்தும் காட்சிகளிலும் தேவையான உணர்வை கொடுத்திருக்கிறார்.
பல இடங்களில் வசனங்களை விட மதுமிதாவின் கண்களே அதிகம் பேசுகின்றன. அந்த வகையில் தனது ஸ்கிரீன் பிரசென்ஸ் மூலம் படம் முழுவதும் கவனம் ஈர்க்கிறார்.
ஆண்டனி – மதுமிதா இடையேயான உறவுதான் மொத்த படத்தையும் தாங்கிப் பிடிக்கும் முக்கிய தூண். அந்த கெமிஸ்ட்ரி சரியாக அமைந்திருப்பது படத்திற்கு பிளஸ்.
‘ஏன் என்னை ஏதோ செய்தாய்’ படத்தை வழக்கமான காதல் படமாக மட்டும் அணுகாமல், இரண்டு மனிதர்களின் உறவையும் அவர்களுக்குள் ஏற்படும் புரிதலையும் பேசும் படமாக உருவாக்க முயன்றிருக்கிறார் இயக்குநர்.
குறிப்பாக முதல் சந்திப்பிலேயே காதல், அடுத்த காட்சியிலேயே பாடல் என்ற வழக்கமான சினிமா பாணியை தவிர்த்து, இருவருக்கும் இடையே கொஞ்சம் கொஞ்சமாக நெருக்கம் உருவாவதை காட்சிகளின் மூலம் பதிவு செய்திருப்பது ரசிக்க வைக்கிறது.
அதேநேரம் இந்த மெதுவான திரைக்கதை சில இடங்களில் படத்திற்கு பின்னடைவாகவும் மாறுகிறது.
காதல் மற்றும் உணர்வுப்பூர்வமான படங்களை ரசிப்பவர்களுக்கு இந்த நிதானமான பயணம் பிடிக்கலாம். ஆனால் அனைத்து தரப்பு ரசிகர்களையும் தொடர்ந்து படத்துடன் பயணிக்க வைக்க வேண்டுமென்றால் சில காட்சிகளின் நீளத்தை குறைத்து திரைக்கதையை இன்னும் இறுக்கமாக்கியிருக்கலாம்.
பியட்ரோ வில்லானியின் ஒளிப்பதிவு படத்தின் காதல் தன்மைக்கு அழகு சேர்க்கிறது. ஆண்டனி – மதுமிதா சம்பந்தப்பட்ட காட்சிகளை ரசனையாக பதிவு செய்திருக்கிறார்.
பாடல்களுக்கு ஜெய்கர் ஹரிநாத் மற்றும் அசோக் ஸ்ரீதரன் இசையமைத்துள்ளனர். பின்னணி இசையை ஜோயி ரெடா கவனித்துள்ளார். காதல் மற்றும் எமோஷனல் காட்சிகளில் பின்னணி இசை கதையுடன் பயணித்து தேவையான உணர்வை ஏற்படுத்துகிறது.
அதேநேரத்தில் படத்தின் சில இடங்களில் வசனங்கள் தெளிவாக கேட்காதது ஒரு குறை. உணர்வுப்பூர்வமான படங்களில் வசனங்களுக்கு அதிக முக்கியத்துவம் இருப்பதால், அந்தப் பகுதிகளில் சவுண்ட் இன்னும் தெளிவாக இருந்திருக்கலாம்.
படத்தின் பலமும் பலவீனமும் அதன் மெதுவான திரைக்கதைதான்.
கதாபாத்திரங்களின் உறவு இயல்பாக வளர வேண்டும் என்பதற்காக இயக்குநர் எடுத்துக் கொண்ட நேரம் காதல் படங்களை விரும்புபவர்களுக்கு ரசிக்கும்படி இருக்கலாம். ஆனால் சில காட்சிகள் தேவைக்கு அதிகமாக நீள்வது போன்ற உணர்வையும் ஏற்படுத்துகின்றன.
குறிப்பாக இரண்டாம் பாதியில் சில காட்சிகளை குறைத்து, முக்கியமான உணர்வுப்பூர்வமான தருணங்களுக்கு கூடுதல் அழுத்தம் கொடுத்திருந்தால் படத்தின் தாக்கம் இன்னும் அதிகமாக இருந்திருக்கும்.
மிகப்பெரிய திருப்பங்கள், ஆக்ஷன், மாஸ் காட்சிகள் என்று எதையும் நம்பாமல் இரண்டு மனிதர்களின் காதல் மற்றும் அவர்களது உணர்வுகளை மட்டுமே நம்பி பயணிக்கும் படமாக வந்திருக்கிறது ‘ஏன் என்னை ஏதோ செய்தாய்’.
ஆண்டனியின் இயல்பான நடிப்பு, மதுமிதா தாஸின் அழகான ஸ்கிரீன் பிரசென்ஸ் மற்றும் நடிப்பு, இருவருக்கும் இடையேயான கெமிஸ்ட்ரி, ஒளிப்பதிவு மற்றும் பின்னணி இசை ஆகியவை படத்தின் பலம்.
திரைக்கதையின் வேகத்தில் இன்னும் கொஞ்சம் கவனம் செலுத்தி, சில நீளமான காட்சிகளை குறைத்திருந்தால் படம் இன்னும் அழுத்தமான காதல் அனுபவமாக அமைந்திருக்கும்.
இருப்பினும், மெதுவாக நகரும் காதல் கதைகளையும் உறவுகளுக்குள் இருக்கும் உணர்வுகளையும் ரசிப்பவர்களுக்கு ‘ஏன் என்னை ஏதோ செய்தாய்’ நிச்சயம் ஒரு கனெக்ட் கொடுக்கக்கூடிய மெலோடி காதல் படமாக அமைந்திருக்கிறது.
