AK Film Factory சார்பில் அருண்குமார் தனசேகரன் தயாரிப்பில், நடிகரும் இசையமைப்பாளருமான ஜி.வி. பிரகாஷ், கயாது லோஹர் நடிப்பில், அறிமுக இயக்குநர் மாரியப்பன் சின்னா இயக்கத்தில் உருவாகியுள்ள திரைப்படம் ‘இம்மார்டல்’. ஃபேண்டஸி திரில்லர் ஜானரில் உருவாகியுள்ள இப்படத்தின் பிரம்மாண்ட முன் வெளியீட்டு விழா சமீபத்தில் உற்சாகமாக நடைபெற்றது.
படக்குழுவினர், திரையுலகப் பிரபலங்கள் மற்றும் சிறப்பு விருந்தினர்கள் கலந்து கொண்ட இவ்விழாவில், ‘இம்மார்டல்’ திரைப்படத்தின் உருவாக்கம், கதைக்களம், விஷுவல் எஃபெக்ட்ஸ், ஆக்ஷன் காட்சிகள் மற்றும் படப்பிடிப்பு அனுபவங்கள் குறித்து பல்வேறு சுவாரஸ்யமான தகவல்கள் பகிரப்பட்டன.
“ஹாலிவுட் தரத்தில் படத்தை உருவாக்க வேண்டும் என்ற கனவு இருந்தது” – தயாரிப்பாளர் அருண்குமார் தனசேகரன்
தயாரிப்பாளர் அருண்குமார் தனசேகரன் பேசுகையில், இயக்குநர் மாரியப்பன் சின்னா முதன்முதலில் இப்படத்தின் கதையை கூறியபோது, அது ஹாலிவுட் படத்திற்கு இணையான பிரம்மாண்டமான காட்சிகளைக் கொண்டதாக இருந்ததாக தெரிவித்தார்.
குறிப்பாக, படத்தின் விஷுவல் கிரியேஷன்கள் மற்றும் சிஜி பணிகள் மிகப்பெரிய அளவில் இருப்பதை அறிந்தபோதும், இயக்குநரின் நம்பிக்கையே இப்படத்தை தயாரிக்கத் தன்னைத் தூண்டியதாக அவர் கூறினார்.
படப்பிடிப்பு தொடங்குவதற்கு முன்பே நீண்ட காலம் முன் தயாரிப்பு பணிகள் மேற்கொள்ளப்பட்டதாகவும், ஒவ்வொரு காட்சியையும் சிஜி மற்றும் விஷுவல் எஃபெக்ட்ஸ் பணிகளுக்கு ஏற்ற வகையில் திட்டமிட்டதாகவும் அவர் தெரிவித்தார்.
இப்படம் உருவாக மூன்று ஆண்டுகளுக்கும் மேலான உழைப்பு இருப்பதாகவும், பல்வேறு நாடுகளைச் சேர்ந்த தொழில்நுட்ப வசதிகள் பயன்படுத்தப்பட்டுள்ளதாகவும் தயாரிப்பாளர் குறிப்பிட்டார்.
ஜி.வி. பிரகாஷ் இப்படத்தில் இணைந்தது படத்திற்கு மிகப்பெரிய பலமாக அமைந்ததாகவும், கயாது லோஹரை சமூக வலைதளங்கள் மூலம் பார்த்து கதாபாத்திரத்திற்கு பொருத்தமாக இருப்பார் என தேர்வு செய்ததாகவும் அவர் தெரிவித்தார்.
‘இம்மார்டல்’ சாதாரண திரைப்படமாக இருக்காது; விஷுவல்ஸ், இசை, சவுண்ட் மற்றும் கிரியேஷன் என அனைத்து அம்சங்களிலும் ஹாலிவுட் தரத்தை நோக்கி படம் உருவாக்கப்பட்டுள்ளது என்றும் அவர் நம்பிக்கை தெரிவித்தார்.
“4000 ஆண்டுகள் வாழும் கதாபாத்திரத்தைச் சுற்றி கதை” – ஜி.வி. பிரகாஷ்
நடிகரும் இசையமைப்பாளருமான ஜி.வி. பிரகாஷ் பேசுகையில், ‘இம்மார்டல்’ திரைப்படம் இந்திய சினிமாவில் புதிதான வாம்பயர் ஜானரில் உருவாகியுள்ளதாக தெரிவித்தார்.
மேலும், இது வாம்பயர் கதைக்களத்துடன் கூடிய சர்வைவல் திரில்லராகவும் இருக்கும் என்றும், சுமார் 4000 ஆண்டுகள் வாழும் ஒரு கதாபாத்திரத்தைச் சுற்றி கதை நகர்வதாகவும் அவர் கூறினார்.
படத்தின் சிஜி மற்றும் மான்ஸ்டர் காட்சிகளை உருவாக்குவதற்காக சுமார் ஒரு வருடம் பணியாற்றியதாக தெரிவித்த ஜி.வி. பிரகாஷ், இப்படம் எந்தவொரு படத்தின் காப்பியும் இல்லை என்றும், முற்றிலும் புதிய அனுபவத்தை ரசிகர்களுக்கு வழங்கும் முயற்சி என்றும் கூறினார்.
கயாது லோஹர் சிறப்பாக நடித்துள்ளதாகவும், குறிப்பாக கார்த்தி கதாபாத்திரம் திரையரங்கில் ரசிகர்களுக்கு ஆச்சரியத்தை ஏற்படுத்தும் என்றும் அவர் குறிப்பிட்டார்.
ஒளிப்பதிவாளர் அருண் ராதாகிருஷ்ணன் மற்றும் இசையமைப்பாளர் சாம் சி.எஸ். ஆகியோரின் பங்களிப்பையும் ஜி.வி. பிரகாஷ் பாராட்டினார். குறிப்பாக சாம் சி.எஸ்.-ன் பின்னணி இசை படத்திற்கு மிகப்பெரிய பலமாக இருக்கும் என்றும் தெரிவித்தார்.
“ஒவ்வொரு காட்சியையும் புதிதாக யோசித்து உருவாக்கினோம்” – இயக்குநர் மாரியப்பன் சின்னா
இயக்குநர் மாரியப்பன் சின்னா பேசுகையில், ‘இம்மார்டல்’ வழக்கமான திரைப்படம் அல்ல என்பதால் ஒவ்வொரு காட்சியையும் புதிதாக யோசித்து உருவாக்க வேண்டியிருந்ததாக தெரிவித்தார்.
தன் கதையின் மீது நம்பிக்கை வைத்து முழு சுதந்திரத்தையும் ஆதரவையும் வழங்கிய தயாரிப்பாளர் அருண்குமார் தனசேகரனுக்கு நன்றி தெரிவித்த அவர், ஜி.வி. பிரகாஷ் கதையை கேட்டவுடன் நம்பிக்கையுடன் படத்தில் இணைந்ததாக கூறினார்.
படத்தின் ஒளிப்பதிவாளர் அருண் ராதாகிருஷ்ணன், எடிட்டர்கள் சான் லோகேஷ் மற்றும் ராஜேஷ் உள்ளிட்ட தொழில்நுட்பக் கலைஞர்களின் பங்களிப்பையும் அவர் பாராட்டினார்.
கயாது லோஹர் தமிழில் ஒரு வார்த்தைகூட தெரியாத நிலையிலும், கதாபாத்திரத்தின் வசனங்களைப் புரிந்துகொண்டு சரியாக பேசுவதற்காக கடுமையாக உழைத்ததாகவும் இயக்குநர் தெரிவித்தார்.
மேலும், ஆக்ஷன் மற்றும் கிளைமாக்ஸ் காட்சிகள் மிகவும் சவாலான சூழலில் படமாக்கப்பட்டதாகவும், சாம் சி.எஸ்., சவுண்ட் டிசைன் குழுவினர் உள்ளிட்ட அனைவரும் முழு அர்ப்பணிப்புடன் பணியாற்றியதாகவும் அவர் கூறினார்.
“இம்மார்டல் எனக்கு மிகவும் முக்கியமான படம்” – சாம் சி.எஸ்.
இசையமைப்பாளர் சாம் சி.எஸ். பேசுகையில், ‘இம்மார்டல்’ தனக்கு மிகவும் முக்கியமான திரைப்படம் என்றும், சில படங்கள் உருவாகும்போதே அவை தனித்துவமானதாக இருக்கும் என்பதை உணர முடியும்; அந்த வகையில் இந்தப் படம் தனக்கு மிகவும் பிடித்த படம் என்றும் தெரிவித்தார்.
தயாரிப்பாளர் அருண்குமார் தனசேகரனின் பாசிட்டிவான அணுகுமுறையும், படக்குழுவினர் மீது அவர் வைத்திருந்த நம்பிக்கையும் இப்படத்தின் மிகப்பெரிய பலம் என சாம் சி.எஸ். குறிப்பிட்டார்.
ஜி.வி. பிரகாஷ் நடிகராகவும் இப்படத்தில் சிறப்பான பங்களிப்பை வழங்கியுள்ளதாகவும், குறிப்பாக படத்தின் இரண்டாம் பாதியில் அவரது கதாபாத்திரத்திற்கு அதிக முக்கியத்துவமும் நடிப்பதற்கான வாய்ப்பும் இருப்பதாகவும் அவர் தெரிவித்தார்.
இயக்குநர் மாரியப்பன் சின்னா உள்ளிட்ட ஒட்டுமொத்த படக்குழுவினரும் ஒரே நோக்கத்துடன் இணைந்து உழைத்திருப்பது திரையில் தெரியும் என்றும், ‘இம்மார்டல்’ ரசிகர்களுக்கு நிச்சயம் புதிய அனுபவத்தை வழங்கும் என்றும் சாம் சி.எஸ். நம்பிக்கை தெரிவித்தார்.
