‘ஹாய்’ படத்திற்கு ரசிகர்கள் கொடுத்த வரவேற்பு… ஊடக நண்பர்களை சந்தித்து நன்றி தெரிவித்த நயன்தாரா – கவின் படக்குழு!

நயன்தாரா மற்றும் கவின் முதன்முறையாக இணைந்து நடித்துள்ள ‘ஹாய்’ திரைப்படம் கடந்த ஆகஸ்ட் 28ஆம் தேதி உலகம் முழுவதும் திரையரங்குகளில் வெளியானது. குடும்ப ரசிகர்களை மையமாகக் கொண்டு உருவாக்கப்பட்ட இந்த படம், ரசிகர்கள் மற்றும் விமர்சகர்களிடையே நல்ல வரவேற்பைப் பெற்று திரையரங்குகளில் வெற்றிகரமாக ஓடிக்கொண்டிருக்கிறது.

இந்த வரவேற்புக்கு நன்றி தெரிவிக்கும் வகையில், ‘ஹாய்’ படக்குழுவினர் பத்திரிகை மற்றும் ஊடக நண்பர்களை சந்தித்து தங்களது மகிழ்ச்சியையும் நன்றியையும் பகிர்ந்து கொண்டனர்.

அறிமுக இயக்குநர் விஷ்ணு எடவன் இயக்கியுள்ள இந்த திரைப்படத்தில் நயன்தாரா, கவின், கே. பாக்யராஜ், பிரபு, ராதிகா சரத்குமார், விடிவி கணேஷ், சத்யன், ‘ஆதித்யா’ கதிர், குரேஷி உள்ளிட்ட பலர் முக்கிய கதாபாத்திரங்களில் நடித்துள்ளனர்.

ராஜேஷ் சுக்லா ஒளிப்பதிவு செய்துள்ள இப்படத்திற்கு ஜென் மார்ட்டின் இசையமைத்துள்ளார். பிலோமின் ராஜ் படத்தொகுப்பை மேற்கொண்டுள்ள நிலையில், எஸ். கண்ணன் கலை இயக்கத்தை கவனித்துள்ளார்.

ஜீ ஸ்டுடியோஸ், தி ரவுடி பிக்சர்ஸ் மற்றும் செவன் ஸ்கிரீன் ஸ்டுடியோ நிறுவனங்கள் சார்பில் நயன்தாரா, விக்னேஷ் சிவன் மற்றும் எஸ்.எஸ். லலித்குமார் ஆகியோர் இணைந்து இப்படத்தை தயாரித்துள்ளனர்.

“நல்ல கதையை ரசிகர்களுக்கு கொடுக்க வேண்டும்” – லலித்குமார்

நிகழ்ச்சியில் பேசிய தயாரிப்பாளர் எஸ்.எஸ். லலித்குமார், ‘ஹாய்’ திரைப்படத்திற்கு ஊடகங்கள் மற்றும் ரசிகர்கள் தொடர்ந்து அளித்து வரும் ஆதரவுக்கு நன்றி தெரிவித்தார்.

பெரிய படங்களுக்குப் பிறகு ஏன் இப்படிப்பட்ட ஒரு படத்தை தயாரிக்கிறீர்கள் என்று பலர் கேட்டதாகவும், ஆனால் நல்ல கதையையும் நல்ல படத்தையும் ரசிகர்களுக்கு கொடுக்க வேண்டும் என்ற நோக்கத்தில்தான் ‘ஹாய்’ உருவாக்கப்பட்டதாகவும் அவர் தெரிவித்தார்.

இன்று படத்திற்கு கிடைக்கும் வரவேற்பு மிகுந்த மகிழ்ச்சியை அளிப்பதாகவும், நடிகர்கள் மற்றும் தொழில்நுட்பக் கலைஞர்களின் பங்களிப்பே இந்த வெற்றிக்கு முக்கிய காரணம் என்றும் அவர் பாராட்டினார்.

இயக்குநர் விஷ்ணு எடவன் கதை சொல்லும் விதம் மிகவும் தனித்துவமானது என்றும், அவர் கதை கூறும்போதே அதன் உணர்வை உணர முடிந்ததாகவும் லலித்குமார் குறிப்பிட்டார்.

“எங்கள் பள்ளிக் கால கனவு நனவானது” – ஜென் மார்ட்டின்

இசையமைப்பாளர் ஜென் மார்ட்டின் பேசுகையில், இயக்குநர் விஷ்ணு எடவன் மற்றும் நடிகர் கவினுடன் இது தனது நான்காவது படம் என்று தெரிவித்தார்.

கவின் தனது பள்ளிக் கால நண்பர் என்றும், பள்ளி நாட்களிலேயே ஒருவர் நடிகராகவும் மற்றொருவர் இசையமைப்பாளராகவும் வர வேண்டும் என்று கனவு கண்டதாகவும் அவர் நினைவுகூர்ந்தார்.

இன்று அந்த கனவு நனவாகி, ‘ஹாய்’ திரைப்படம் நல்ல வரவேற்பைப் பெற்றிருப்பது மிகுந்த மகிழ்ச்சியை அளிப்பதாகவும் ஜென் மார்ட்டின் தெரிவித்தார்.

“ஹாய் ஒரு அழகான Feel-Good படம்” – அம்ருதா சீனிவாசன்

நடிகை அம்ருதா சீனிவாசன், ‘ஹாய்’ உண்மையிலேயே ஒரு அழகான Feel-Good திரைப்படம் என்று கூறினார்.

இசை, படத்தொகுப்பு, இயக்கம் மற்றும் கதை என அனைத்து துறைகளும் ஒன்றிணைந்து செயல்பட்டால்தான் இப்படிப்பட்ட முழுமையான திரைப்படம் உருவாக முடியும் என்றும், இயக்குநர் விஷ்ணு ஒவ்வொரு ஃபிரேமையும் கவனமாக செதுக்கியுள்ளதாகவும் அவர் பாராட்டினார்.

படத்தை பார்த்து வெளியே வரும்போது மகிழ்ச்சியான உணர்வு கிடைப்பதாகவும், ரசிகர்களும் தொடர்ந்து ஆதரவு அளிக்க வேண்டும் என்றும் அவர் கேட்டுக்கொண்டார்.

நடிகராக மேடையில் நின்ற குரேஷி

நடிகர் குரேஷி பேசுகையில், பல நிகழ்ச்சிகளில் தொகுப்பாளராக நடிகர்களை வரவேற்ற தானே, இன்று ஒரு நடிகராக இந்த மேடையில் நிற்பது மகிழ்ச்சியாக இருப்பதாக தெரிவித்தார்.

கவின் மற்றும் இயக்குநர் விஷ்ணு எடவன் தன்னிடம் வைத்த நம்பிக்கைக்கு நன்றி தெரிவித்த அவர், பிரபு மற்றும் ராதிகா சரத்குமார் போன்ற மூத்த கலைஞர்களுடன் பணியாற்றிய அனுபவம் மறக்க முடியாதது என்றும் கூறினார்.

“இது என் பயணத்தின் தொடக்கம்” – காவ்யா

நடிகை காவ்யா, ‘ஹாய்’ படத்திற்கு ரசிகர்கள் அளித்துவரும் அன்பு மிகுந்த மகிழ்ச்சியை அளிப்பதாக கூறினார்.

கல்லூரி காலத்திலிருந்தே ராதிகா சரத்குமாரை பார்த்து பெரிய நடிகையாக வேண்டும் என்று கனவு கண்டதாகவும், இன்று அவருடன் திரையைப் பகிர்ந்து நடித்தது கனவு நனவான தருணமாக இருந்ததாகவும் தெரிவித்தார்.

“மைதிலி” கதாபாத்திரத்துக்கு ரசிகர்கள் அளித்துவரும் அன்புக்கும் அவர் நன்றி தெரிவித்தார்.

“என் முதல் படத்தின் வெற்றி எல்லோருடையது” – விஷ்ணு எடவன்

இயக்குநர் விஷ்ணு எடவன் பேசுகையில், ‘ஹாய்’ தனது முதல் திரைப்படம் என்பதால் இயக்குநராக இந்த மேடையில் நிற்பது மிகப்பெரிய மகிழ்ச்சி என தெரிவித்தார்.

தன்னை நம்பி வாய்ப்பு அளித்த தயாரிப்பாளர்கள் விக்னேஷ் சிவன், நயன்தாரா, எஸ்.எஸ். லலித்குமார் மற்றும் படக்குழுவினர் அனைவருக்கும் நன்றி தெரிவித்தார்.

மூத்த நடிகர்கள் முதல் இளம் நடிகர்கள் வரை அனைவரும் தங்களது கதாபாத்திரங்களுக்கு முழுமையான ஒத்துழைப்பை வழங்கியதாகவும், ஜென் மார்ட்டின், ராஜேஷ் சுக்லா, பிலோமின் ராஜ் உள்ளிட்ட தொழில்நுட்பக் கலைஞர்கள் படத்திற்கு முக்கிய பலமாக இருந்ததாகவும் அவர் குறிப்பிட்டார்.

இந்த வெற்றி தனக்கு மட்டும் கிடைத்த வெற்றியல்ல; தன்னை நம்பி பயணத்தில் இணைந்த ஒவ்வொருவருக்கும் கிடைத்த வெற்றி என்றும் விஷ்ணு எடவன் தெரிவித்தார்.

“இன்றைய சூழலில் ஒரு படம் ஓடுவது சவால்” – ராதிகா சரத்குமார்

நடிகை ராதிகா சரத்குமார் பேசுகையில், இன்றைய சூழலில் ஒரு திரைப்படம் வெற்றிகரமாக ஓடுவது மிகவும் சவாலான விஷயம் என்று கூறினார்.

பல்வேறு சவால்களை கடந்து ‘ஹாய்’ படத்தை உருவாக்கி ரசிகர்களிடம் கொண்டு சேர்த்திருக்கும் படக்குழுவினருக்கு பாராட்டு தெரிவித்த அவர், கவினின் ‘டாடா’ படத்தை பார்த்தபோதே அவருக்கு சிறந்த எதிர்காலம் இருப்பதாக நினைத்ததாகவும் கூறினார்.

மேலும் நயன்தாரா வெளியில் மென்மையாகத் தோன்றினாலும், மனதளவிலும் உடல் ரீதியாகவும் மிகவும் வலிமையானவர் என்றும் அவர் பாராட்டினார்.

“இந்த வெற்றியை முழுமையாக கொண்டாடுங்கள்” – சுஹாசினி

நடிகை சுஹாசினி, ‘ஹாய்’ படத்தில் தனக்கு ஒரு காட்சி மட்டுமே இருந்தாலும் அந்த அனுபவம் மகிழ்ச்சிகரமாக இருந்ததாக தெரிவித்தார்.

கடந்த சில நாட்களாக படத்தைப் பற்றி நல்ல கருத்துகளை கேட்டு வருவதாகவும், படக்குழுவினர் இந்த வெற்றிக்கு தகுதியானவர்கள் என்றும் அவர் கூறினார்.

இப்படிப்பட்ட மகிழ்ச்சியான தருணங்கள் வாழ்க்கையில் அடிக்கடி கிடைக்காது என்பதால், இந்த வெற்றியை முழுமையாக கொண்டாட வேண்டும் என்றும் அவர் படக்குழுவினருக்கு வாழ்த்து தெரிவித்தார்.

“கவினுக்கு நல்ல எதிர்காலம் இருக்கிறது” – பிரபு

நடிகர் பிரபு, ‘ஹாய்’ ஒரு அருமையான படக்குழு என்று குறிப்பிட்டார்.

இயக்குநர் விஷ்ணு தனக்கு நல்ல கதாபாத்திரம் வழங்கியதற்கு நன்றி தெரிவித்த அவர், தயாரிப்பாளர் லலித்குமார் மற்றும் நயன்தாராவுக்கும் நன்றி கூறினார்.

கவின் இந்த படத்தில் சிறப்பாக நடித்திருப்பதாகவும், அவரிடம் நிறைய திறமை மற்றும் நல்ல எதிர்காலத்திற்கான பலம் இருப்பதாகவும் பிரபு பாராட்டினார்.

ஜென் மார்ட்டினின் இசையும் படத்திற்கு முக்கிய பலமாக அமைந்துள்ளதாக அவர் குறிப்பிட்டார்.

“குடும்பத்துடன் பார்த்தால் மனம் நிறைந்த மகிழ்ச்சி” – கவின்

நிகழ்ச்சியில் பேசிய நடிகர் கவின், ஆகஸ்ட் மாத இறுதியில் வெளியான ‘ஹாய்’ திரைப்படத்திற்கு ரசிகர்கள் அளித்த ஆதரவு ஆச்சரியமும் மகிழ்ச்சியும் அளித்துள்ளதாக கூறினார்.

சமீபத்தில் பல நல்ல திரைப்படங்கள் வெளியாகி வரவேற்பைப் பெற்ற நிலையில், ‘ஹாய்’ படத்துக்கு ரசிகர்கள் எவ்வளவு ஆதரவு அளிப்பார்கள் என்ற சிறிய பதற்றம் இருந்ததாகவும், ஆனால் பல ஊர்களில் ரசிகர்கள் திரையரங்குகளில் உற்சாகமாக படம் பார்ப்பதை காணும்போது மிகுந்த மகிழ்ச்சி அளிப்பதாகவும் தெரிவித்தார்.

“குடும்பத் தேவைகளுக்கான செலவுகளை முடித்த பிறகு, பொழுதுபோக்கிற்காக நீங்கள் ஒதுக்கும் நேரத்தையும் பணத்தையும் ‘ஹாய்’ படத்திற்காக செலவிட்டால் மனம் நிறைந்த மகிழ்ச்சியுடன் திரும்பிச் செல்வீர்கள்” என்று கவின் நம்பிக்கை தெரிவித்தார்.

திரையரங்குகளில் ரசிகர்கள் சிரித்து, மகிழ்ந்து, சில காட்சிகளில் உணர்ச்சிவசப்பட்டு படத்தை ரசிப்பதை பார்க்கும்போது, படத்தை உருவாக்கிய நோக்கம் நிறைவேறியதாக உணர்கிறேன் என்றும் அவர் கூறினார்.

குடும்பத்துடன் அனைவரும் கவலைகளை மறந்து ரசிக்க வேண்டும் என்பதற்காகவே இந்தப் படம் எளிமையான, அழகான பொழுதுபோக்கு திரைப்படமாக உருவாக்கப்பட்டதாக கவின் தெரிவித்தார்.

மேலும் இயக்குநர் விஷ்ணுவின் பயணம் மிகவும் சிறப்பானது என்றும், ஒரு படம் வெற்றி பெறுகிறதா தோல்வி அடைகிறதா என்பதைக் காட்டிலும் அந்த படத்தின் பயணத்தில் கிடைக்கும் மனிதர்களும் உறவுகளுமே முக்கியம் என்றும் கவின் தெரிவித்தார்.

ராதிகா சரத்குமார், பிரபு, சுஹாசினி, பாக்யராஜ் உள்ளிட்ட நடிகர்களே அந்தந்த கதாபாத்திரங்களில் நடிக்க வேண்டும் என கதை கேட்டபோதே விரும்பியதாகவும், இன்று அனைவரும் சேர்ந்து படத்தின் வெற்றியை கொண்டாடுவது மகிழ்ச்சியளிப்பதாகவும் கவின் தெரிவித்தார்.

குடும்பத்துடன் பார்க்கக்கூடிய Feel-Good Entertainer ஆக உருவாகியுள்ள ‘ஹாய்’ திரைப்படம் கடந்த ஆகஸ்ட் 28ஆம் தேதி வெளியான நிலையில், தற்போது ரசிகர்களின் ஆதரவுடன் திரையரங்குகளில் தொடர்ந்து ஓடிக்கொண்டிருக்கிறது.