“இது இந்தியத் திறமையின் உச்சம்!” – சங்ககிரி ராஜ்குமாரின் ‘ONE MAN’ படத்தை பாராட்டிய திரையுலகினர்

தமிழ் சினிமாவில் வித்தியாசமான முயற்சிகளுக்கு பெயர் பெற்ற படைப்பாளிகளில் ஒருவரான சங்ககிரி ராஜ்குமார், தனது புதிய திரைப்படமான ‘ONE MAN’ மூலம் மீண்டும் கவனம் ஈர்த்துள்ளார்.

‘வெங்காயம்’, ‘பயாஸ்கோப்’ உள்ளிட்ட படங்களை இயக்கி, தயாரித்து, நடித்து தனது தனித்துவமான சினிமா பயணத்தை தொடர்ந்து வரும் சங்ககிரி ராஜ்குமார், ‘ONE MAN’ திரைப்படத்தில் கதையின் நாயகனாக மட்டுமின்றி, ஒரு திரைப்படத்தின் உருவாக்கத்திற்கு தேவையான 70-க்கும் மேற்பட்ட துறைகளில் தனி ஒருவராக பணியாற்றியுள்ளதாக படக்குழு தெரிவித்துள்ளது.

உலகம் முழுவதும் வரும் 21-ஆம் தேதி திரையரங்குகளில் வெளியாக உள்ள இப்படத்தை விளம்பரப்படுத்தும் வகையில் சென்னையில் பத்திரிகையாளர் சந்திப்பு நடைபெற்றது. இதில் நடிகர் சத்யராஜ், இயக்குநர்கள் சேரன், லெனின் பாரதி மற்றும் ஏ.ஆர்.கே. ராஜராஜா உள்ளிட்டோர் சிறப்பு விருந்தினர்களாக கலந்து கொண்டு படக்குழுவினரை வாழ்த்தினர்.

‘ONE MAN’ – தனி மனிதனின் சினிமா பயணம்

‘ONE MAN’ திரைப்படத்தின் உருவாக்கம் குறித்து பேசிய இயக்குநர் சங்ககிரி ராஜ்குமார், படத்தின் அனைத்து பணிகளையும் நிறைவு செய்த பிறகு, திரையரங்க வெளியீட்டிற்கான வழிகாட்டுதலைப் பெற தயாரிப்பாளர் கலைப்புலி எஸ். தாணுவை சந்தித்ததாக தெரிவித்தார்.

அவரது முயற்சிக்கு ஆதரவளித்த எஸ். தாணு, PVR நிறுவனத்துடன் தொடர்பு கொண்டு பேசியதாகவும், அதன் மூலம் படத்தை ரசிகர்களிடம் கொண்டு சேர்க்கும் வாய்ப்பு கிடைத்ததாகவும் சங்ககிரி ராஜ்குமார் கூறினார்.

மேலும், படப்பிடிப்புக்குப் பிந்தைய தொழில்நுட்பப் பணிகளுக்காக இயக்குநர் ஏ.ஆர்.கே. ராஜராஜாவை அணுகியபோது, தனது ஸ்டுடியோவை எப்போது வேண்டுமானாலும் பயன்படுத்திக் கொள்ளலாம் என்று அவர் கூறி உதவியதாகவும், இந்த ஆதரவுகளுக்கு நன்றி தெரிவிப்பதாகவும் சங்ககிரி ராஜ்குமார் குறிப்பிட்டார்.

“இது ஒரு வரலாற்றுப் பதிவு” – ஏ.ஆர்.கே. ராஜராஜா

இப்படத்தின் உருவாக்கம் குறித்து பேசிய இயக்குநர் ஏ.ஆர்.கே. ராஜராஜா, ஒரே மனிதர் அனைத்து பணிகளையும் செய்து, பல்வேறு கதாபாத்திரங்களில் நடித்து ஒரு திரைப்படத்தை உருவாக்குவதாக சங்ககிரி ராஜ்குமார் கூறியபோது தமக்கும் ஆரம்பத்தில் சந்தேகம் இருந்ததாக தெரிவித்தார்.

ஆனால், அவர் பணியாற்றிய விதத்தை நேரில் பார்த்தபோது ஆச்சரியமடைந்ததாகவும், படப்பிடிப்புக்குப் பிந்தைய தொழில்நுட்பப் பணிகளையும் அவரே மேற்கொண்டதாகவும் கூறினார்.

‘ONE MAN’ திரைப்படத்தை பார்த்த பிறகு, ஒரு திரைப்படத்தை தொழில்நுட்ப ரீதியாக சிறந்த தரத்தில் உருவாக்க வேண்டிய விதத்தில் சங்ககிரி ராஜ்குமார் உருவாக்கியிருப்பது தன்னை ஆச்சரியப்படுத்தியதாகவும், இது ஒரு வரலாற்றுப் பதிவு என்றும் ஏ.ஆர்.கே. ராஜராஜா பாராட்டினார்.

“இந்தியத் திறமையின் உச்சம்” – லெனின் பாரதி

இயக்குநர் லெனின் பாரதி பேசுகையில், ‘ONE MAN’ திரைப்படம் தமிழ் சினிமாவிற்கு மட்டுமின்றி இந்திய சினிமாவிற்கும் முக்கியமான முயற்சி என்று குறிப்பிட்டார்.

பெரும்பாலான பிரம்மாண்டமான திரைப்படங்களுக்குப் பின்னால் ஆயிரக்கணக்கான தொழில்நுட்பக் கலைஞர்களின் உழைப்பும், பெரிய நிறுவனங்களின் பங்களிப்பும் இருக்கும் நிலையில், அவ்வாறான மிகப்பெரிய பின்னணி இல்லாமல் சங்ககிரி ராஜ்குமார் தனி மனிதராக இத்தகைய முயற்சியை மேற்கொண்டிருப்பது பாராட்டுக்குரியது என்றார்.

சினிமாவை ஆழமாக நேசிக்கும் ஒருவரால் மட்டுமே இப்படியான முயற்சியை மேற்கொள்ள முடியும் என்றும், சினிமா மூலமாக ஒரு செய்தியை மக்களிடம் கொண்டு செல்ல வேண்டும் என்ற ஆர்வம் சங்ககிரி ராஜ்குமாரிடம் இருப்பதாகவும் லெனின் பாரதி தெரிவித்தார்.

மேலும், திரைப்படக் கல்லூரி மாணவர்களுக்கு ‘ONE MAN’ திரைப்படத்தை திரையிட்டுக் காண்பித்து, தொழில்நுட்பத்தை எவ்வாறு பயன்படுத்தலாம் என்பது குறித்து சங்ககிரி ராஜ்குமார் தனது அனுபவத்தைப் பகிர்ந்து கொள்ள வேண்டும் என்றும் அவர் கோரிக்கை விடுத்தார்.

“சினிமா ஒரு நாள் அவரைக் கொண்டாடியே தீரும்” – சேரன்

இயக்குநர் சேரன் பேசுகையில், சங்ககிரி ராஜ்குமாரின் முந்தைய படமான ‘வெங்காயம்’ தன்னை மிகவும் கவர்ந்ததாக தெரிவித்தார். அந்தப் படத்தைப் பார்த்த பிறகு, தனது அழைப்பின் பேரில் 50-க்கும் மேற்பட்ட இயக்குநர்கள் படத்தை பார்த்ததாகவும், அதன் மூலம் அந்த திரைப்படத்திற்கு பரவலான கவனம் கிடைத்ததாகவும் கூறினார்.

‘வெங்காயம்’ திரைப்படம் திரையரங்குகளில் குறுகிய காலத்திலேயே வெளியேறிய பின்னர், ‘சேரன் வழங்கும் வெங்காயம்’ என்ற பெயரில் மீண்டும் வெளியாகி வெற்றி பெற்றதையும் அவர் நினைவுகூர்ந்தார்.

சங்ககிரி ராஜ்குமார் சினிமாவில் சம்பாதிப்பதற்காக மட்டுமே வரவில்லை என்றும், ஒரு சாமானியனாலும் திரைப்படத்தை உருவாக்க முடியும் என்பதை நிரூபிக்க வேண்டும் என்ற எண்ணம் அவரிடம் இருப்பதாகவும் சேரன் கூறினார்.

‘ONE MAN’ திரைப்படத்தை இரண்டு ஆண்டுகளுக்கு முன்பே பார்த்ததாக தெரிவித்த சேரன், அதன் பிறகும் பல்வேறு தொழில்நுட்பப் பணிகளை மேற்கொண்டு படத்தை மேலும் சிறப்பாக செதுக்கியிருப்பதாக பாராட்டினார்.

மேலும், படத்தில் பல்வேறு கதாபாத்திரங்களில் சங்ககிரி ராஜ்குமார் நடித்திருந்தாலும், எந்த இடத்திலும் ‘ராஜ்குமார்’ தெரியாமல் அந்தந்த கதாபாத்திரங்களே தெரியும் அளவிற்கு அவர் உழைத்திருப்பதாகவும் சேரன் குறிப்பிட்டார்.

கிட்டத்தட்ட ஐந்து ஆண்டுகள் உழைத்து இப்படத்தை உருவாக்கியுள்ள சங்ககிரி ராஜ்குமாருக்கு எதிர்காலத்தில் தமிழ் சினிமா நிச்சயம் உரிய அங்கீகாரம் வழங்கும் என்றும், சினிமா மீதான அவரது நேசத்தால் ஒரு நாள் சினிமா அவரைக் கொண்டாடும் என்றும் சேரன் தெரிவித்தார்.

“இது மிகப்பெரும் சாதனை” – சத்யராஜ்

நடிகர் சத்யராஜ் பேசுகையில், சங்ககிரி ராஜ்குமாருடன் இணைந்து பணியாற்றியதற்கான பின்னணியை பகிர்ந்து கொண்டார்.

‘ONE MAN’ திரைப்படத்தின் தனித்துவமான முயற்சி குறித்து கேள்விப்பட்டபோது, ஒரே மனிதர் அனைத்து பணிகளையும் செய்வது எப்படி சாத்தியம் என்ற கேள்வி தனக்கும் இருந்ததாக தெரிவித்த சத்யராஜ், தற்போது வரை அதற்கான முழுமையான ஆச்சரியம் நீடிப்பதாக கூறினார்.

சங்ககிரி ராஜ்குமாரின் முந்தைய படைப்புகளான ‘வெங்காயம்’ மற்றும் ‘பயாஸ்கோப்’ ஆகியவற்றைப் பார்த்து தான் பிரமித்ததாகவும், அந்த அனுபவத்தின் காரணமாகவே ‘ONE MAN’ திரைப்படத்திற்கும் தனது ஆதரவை வழங்குவதாகவும் தெரிவித்தார்.

மேலும், ‘ONE MAN’ திரைப்படம் மக்களை சென்றடைய ஊடகங்கள் முழுமையாக ஆதரவு அளிக்க வேண்டும் என சத்யராஜ் கேட்டுக்கொண்டார்.

“இவர் வெற்றி பெற்றால்தான் இவரைப் போன்ற புதிய முயற்சிகளுடன் ஏராளமான இளைஞர்கள் தமிழ் சினிமாவிற்கு வருவார்கள்” என்றும் சத்யராஜ் தெரிவித்தார்.

‘ONE MAN’ திரைப்படம் வரும் 21-ஆம் தேதி உலகம் முழுவதும் திரையரங்குகளில் வெளியாகிறது.