ஹவுஸ்ஃபுல் காட்சிகளால் வெற்றி நடைபோடும் ‘மொத ராத்திரி’ – நன்றி தெரிவித்த படக்குழு!

ராஜா கருப்பசாமி இயக்கத்தில் ரிஷிகாந்த், அனிஷ்மா அனில்குமார் ஆகியோர் முதன்மை கதாபாத்திரங்களில் நடித்துள்ள திரைப்படம் ‘மொத ராத்திரி’. மைத்ரி மூவி மேக்கர்ஸ் நிறுவனம் தயாரித்துள்ள இப்படம், ஆகஸ்ட் 21-ஆம் தேதி உலகம் முழுவதும் திரையரங்குகளில் வெளியாகி ரசிகர்களிடம் நல்ல வரவேற்பைப் பெற்று வருகிறது. இப்படத்தின் வெற்றியைத் தொடர்ந்து படக்குழுவினர் சார்பில் நன்றி தெரிவிக்கும் விழா நடைபெற்றது.

இந்த நிகழ்வில் தயாரிப்பாளர் நவீன் யெர்னேனி, இயக்குநர் ராஜா கருப்பசாமி, நடிகர் ரிஷிகாந்த், அனிஷ்மா அனில்குமார் உள்ளிட்ட படக்குழுவினர் கலந்து கொண்டு, படத்திற்கு ஆதரவளித்த ரசிகர்கள், ஊடகங்கள் மற்றும் திரையரங்கு உரிமையாளர்களுக்கு நன்றி தெரிவித்தனர்.

தயாரிப்பாளர் நவீன் யெர்னேனி பேசுகையில், ‘மொத ராத்திரி’ படத்தை தயாரித்ததில் மிகுந்த மகிழ்ச்சி அடைவதாகவும், ரசிகர்கள் படத்தை கொண்டாடி வருவதாகவும் தெரிவித்தார். இயக்குநர் ராஜா கருப்பசாமி கதை சொன்னவுடனேயே தனக்கு மிகவும் பிடித்துவிட்டதாகக் கூறிய அவர், தற்போது படம் பல திரையரங்குகளில் ஹவுஸ்ஃபுல் காட்சிகளுடன் ஓடிக்கொண்டிருப்பதாக குறிப்பிட்டார்.

மேலும், ‘குட் பேட் அக்லி’, ‘டியூட்’ படங்களைத் தொடர்ந்து தமிழில் மைத்ரி மூவி மேக்கர்ஸ் நிறுவனத்திற்கு ‘மொத ராத்திரி’ மூன்றாவது வெற்றிப் படமாக அமைந்துள்ளதாகவும், இப்படத்தை மற்ற மொழிகளிலும் கொண்டு செல்லும் எண்ணம் இருப்பதாகவும் அவர் தெரிவித்தார்.

“சின்ன படங்களுக்கு ஆதரவு தேவை” – இயக்குநர் ராஜா கருப்பசாமி

விழாவில் பேசிய இயக்குநர் ராஜா கருப்பசாமி, தனது கதையை நம்பி வாய்ப்பளித்த மைத்ரி மூவி மேக்கர்ஸ் நிறுவனத்திற்கும், படக்குழுவினருக்கும் நன்றி தெரிவித்தார். அனைத்து திரையரங்குகளிலும் படம் ஹவுஸ்ஃபுல் காட்சிகளுடன் ஓடுவது மிகுந்த மகிழ்ச்சி அளிப்பதாகக் கூறினார்.

சுமார் ஆறு ஆண்டுகளுக்கு முன்பு இந்தக் கதையை எடுத்துக்கொண்டு வாய்ப்புக்காக அலைந்ததாகவும், அப்போது பலரும் கதாநாயகனாக நடிக்கும் ரிஷிகாந்தை மாற்றுமாறு கூறியதாகவும் அவர் தெரிவித்தார். ஆனால், ரிஷிகாந்த் மீது நம்பிக்கை வைத்து அவரை கதாநாயகனாக நடிக்க வைத்ததாகவும், தற்போது அவருக்கான தனித்துவமான அடையாளத்தை இந்தப் படம் உருவாக்கியிருப்பதாகவும் கூறினார்.

அனிஷ்மா அனில்குமாரின் நடிப்பையும் பாராட்டிய ராஜா கருப்பசாமி, தமிழ் சினிமாவில் புதிய திறமைகள் வளர சிறிய படங்களுக்கு ரசிகர்களின் ஆதரவு மிகவும் அவசியம் என்றும் தெரிவித்தார்.

“ஆறு வருட பயணம் வெற்றியடைந்துள்ளது” – ரிஷிகாந்த்

நடிகர் ரிஷிகாந்த் பேசுகையில், தன்னையும் ‘மொத ராத்திரி’ படத்தையும் தனது வீட்டு பையனாக நினைத்து ஆதரித்த ஊடகத்துறையினர் மற்றும் ரசிகர்களுக்கு நன்றி தெரிவித்தார்.

“ஆறு வருடங்களாக இந்தப் படத்தை நானும் இயக்குநர் ராஜாவும் சுமந்து கொண்டிருந்தோம். எங்களை நம்பி வாய்ப்பளித்த மைத்ரி மூவி மேக்கர்ஸ் நிறுவனத்திற்கு நன்றி. குடும்பத்தோடு திரையரங்குகளுக்கு வந்து அனைவரும் சிரித்து மகிழும் வகையில் ஒரு படத்தை உருவாக்க வேண்டும் என்று நினைத்தோம். அது தற்போது நிறைவேறியுள்ளது,” என அவர் தெரிவித்தார்.

படக்குழுவினருக்கு குவிந்த பாராட்டு

ஒளிப்பதிவாளர் சுரேந்திரன் பரஞ்சோதி, படத்தொகுப்பாளர் அசோக் அர்ஜூனன், இசையமைப்பாளர் பரத் சங்கர் உள்ளிட்ட தொழில்நுட்பக் கலைஞர்கள், தங்களுக்கு வாய்ப்பளித்த தயாரிப்பாளர் மற்றும் இயக்குநருக்கு நன்றி தெரிவித்தனர்.

நடிகைகள் சுமித்ரா தேவி, வர்ஷினி கார்மேகம், இனியா ராம், தீபிகா உள்ளிட்டோரும் படத்தின் வெற்றி மகிழ்ச்சி அளிப்பதாக தெரிவித்தனர். குறிப்பாக, புதிய திறமைகளுக்கு வாய்ப்பளித்த மைத்ரி மூவி மேக்கர்ஸ் நிறுவனத்திற்கு அவர்கள் நன்றி தெரிவித்தனர்.

நடிகர்கள் திலீப், கார்த்திகேயன் டிகே, அப்துல் லீ உள்ளிட்டோரும் ‘மொத ராத்திரி’ தங்களுக்கு முக்கியமான படமாக அமைந்துள்ளதாகவும், இந்த வெற்றி தங்களது திரைப்பயணத்தில் புதிய அடையாளத்தை ஏற்படுத்தியுள்ளதாகவும் தெரிவித்தனர்.

நடிகர் சேத்தன் பேசுகையில், புதிய திறமைகளுக்கு வாய்ப்பளித்த தயாரிப்பு நிறுவனத்தை பாராட்டியதுடன், ‘மொத ராத்திரி’ படத்திலிருந்து பல புதிய நட்சத்திரங்கள் உருவாக வாய்ப்புள்ளதாக தெரிவித்தார். மேலும், ரிஷிகாந்தின் நடிப்பையும் அவர் பாராட்டினார்.

நடிகர் பகவதி பெருமாள், சிறிய பட்ஜெட்டில் உருவாகும் திரைப்படங்கள் வெற்றி பெறுவதற்கு தயாரிப்பாளர்களின் ஆதரவும் ரசிகர்களின் வரவேற்பும் மிகவும் முக்கியம் எனக் குறிப்பிட்டார். ‘மொத ராத்திரி’ போன்ற படங்கள் பலருடைய வாழ்க்கையில் புதிய வெளிச்சத்தை ஏற்படுத்தும் என்றும் அவர் தெரிவித்தார்.

‘மொத ராத்திரி’ திரைப்படத்தின் வெற்றியை கொண்டாடும் வகையில் நடைபெற்ற இந்த நன்றி தெரிவிக்கும் விழா, படக்குழுவினரின் மகிழ்ச்சியையும், புதிய கலைஞர்களின் நம்பிக்கையையும் வெளிப்படுத்தும் நிகழ்வாக அமைந்தது.