‘பைசன் காளமாடன்’ திரைப்படத்தின் வெற்றியைத் தொடர்ந்து, பிர்லா ஸ்டுடியோஸ் மற்றும் நீலம் ஸ்டுடியோஸ் இணைந்து தயாரிக்கும் அடுத்த திரைப்படமாக ‘மக்கள் காவலன்’ அதிகாரப்பூர்வமாக அறிவிக்கப்பட்டுள்ளது. சமூக அரசியல் பின்னணியுடன் உருவாகும் இந்த ஆக்ஷன் டிராமாவில் நடிகர் கே. மணிகண்டன் கதாநாயகனாக நடிக்கிறார்.
தமிழ் சினிமாவில் குட் நைட், லவ்வர், குடும்பஸ்தன் உள்ளிட்ட படங்கள் மூலம் தனக்கென தனி ரசிகர் பட்டாளத்தை உருவாக்கியுள்ள மணிகண்டன், தனது திரைப்பயணத்தில் முதல் முறையாக முழுநீள ஆக்ஷன் டிராமா கதாபாத்திரத்தில் நடிப்பது இந்தப் படத்தின் முக்கிய அம்சமாகும்.
இப்படத்தை எழுதி இயக்கியுள்ள சந்தோஷ் குமார், அதிகார அமைப்புகளுக்குள் சிக்கிக் கொள்ளும் ஒரு சாதாரண மனிதன், சூழ்நிலையால் மக்களின் காவலனாக மாறும் போராட்டப் பயணத்தை விறுவிறுப்பாக திரைக்குக் கொண்டு வருகிறார்.
சமூகப் பின்னணியில் உருவாகும் சக்திவாய்ந்த கதை
கண்ணியமாக வாழ வேண்டும் என்ற ஒரே நோக்கத்துடன் இருக்கும் ஒரு சாதாரண மனிதன், ஊழல் நிறைந்த அதிகார அமைப்பின் அநீதியை எதிர்கொள்ளும் நிலைக்கு தள்ளப்படுகிறார். உயிர்வாழ்வதற்கான தனிப்பட்ட போராட்டமாக தொடங்கும் அவரது வாழ்க்கை, மக்களுக்காக போராடும் தலைவராக மாறும் தருணத்தை எட்டுகிறது. அந்தப் பயணத்தின் வலியும், தியாகமும், சமூக நீதி மீதான போராட்டமும் தான் ‘மக்கள் காவலன்’ திரைப்படத்தின் மையக்கருவாக அமைந்துள்ளது.
வலுவான நடிகர் பட்டாளம்
கே. மணிகண்டனுடன் வாகை சந்திரசேகர், ஏ. வெங்கடேஷ், ஆர்.கே. விஜய்முருகன், சண்முகம் முத்துசாமி, சபுமோன், உன்னி மாயா, திவ்யா ஸ்ரீபாதா, ஜென்சன் திவாகர், லல்லு, ஜெமினி மணி, ரகு உள்ளிட்டோர் முக்கிய கதாபாத்திரங்களில் நடித்துள்ளனர்.
தொழில்நுட்பக் குழு
ஒளிப்பதிவு – பிரதீபன் செல்வரத்தினம்
படத்தொகுப்பு – அருள் மோசஸ்
கலை இயக்கம் – பாப்பநாடு சி. உதயகுமார்
சண்டைப் பயிற்சி – டான் அசோக்
ஒலியமைப்பு – ஆண்டனி ஜெயரூபன்
ஆடை வடிவமைப்பு – சுரேஷ்குமார்
ஒப்பனை – ராமச்சந்திரன்
இசை – நிவாஸ் கே. பிரசன்னா
படக்குழுவின் நம்பிக்கை
பிர்லா ஸ்டுடியோஸ் மற்றும் நீலம் ஸ்டுடியோஸ் ஆகிய இரு தயாரிப்பு நிறுவனங்களும், சமூக கருத்துகளுடன் கூடிய வணிக ரீதியான தரமான திரைப்படமாக ‘மக்கள் காவலன்’ உருவாகி வருவதாக தெரிவித்துள்ளன. இயக்குநர் சந்தோஷ் குமாரின் எழுத்தும், மணிகண்டனின் இயல்பான நடிப்பும் இந்தப் படத்தின் மிகப்பெரிய பலமாக இருக்கும் என படக்குழு நம்பிக்கை தெரிவித்துள்ளது.
