“ஒரு புகைப்படத்திற்காக தொடங்கும் பயணம்… உயிருக்கும் மரணத்துக்கும் இடையிலான திகில் அனுபவமாக மாறினால்?” அந்த வித்தியாசமான ஒன்-லைன் கதையை மையமாகக் கொண்டு உருவாகியிருக்கும் திரைப்படம் தான் ‘போட்டோகிராஃபர்’.
புகைப்படக் கலை மீது தீராத ஆர்வம் கொண்ட இளைஞன் வீரா (அஷ்ரஃப்), அனைவரும் அச்சப்படும் மர்மக் காட்டிற்குள் ஒரு அரிய புகைப்படத்தை எடுக்கச் செல்கிறார். ஆனால் அந்த ஒரு முடிவு, அவரை உயிர் பிழைப்பதற்கான போராட்டத்தில் தள்ளுகிறது. காட்டின் மர்மம் என்ன? அங்கிருந்து அவர் மீண்டு வருகிறாரா? என்பதே படத்தின் மையக்கதை.
படத்தின் மிகப்பெரிய பலம் அதன் திரைக்கதை உருவாக்கும் மர்ம உணர்வு. முதல் பாதி கதாபாத்திரங்களையும், நாயகனின் மனநிலையையும் அமைதியாக அறிமுகப்படுத்தினாலும், காடு என்ற இடத்திற்குள் நுழைந்த பிறகு கதை முழுக்க வேறு பரிமாணத்திற்கு செல்கிறது. அடுத்த நிமிடம் என்ன நடக்கும் என்ற எதிர்பார்ப்பை இயக்குநர் தொடர்ந்து உருவாக்கியிருக்கிறார்.
இயக்குநரும் நாயகனுமான அஷ்ரஃப், முதல் படத்திலேயே கவனிக்க வைக்கும் நடிப்பை வழங்கியுள்ளார். சுத்தம் மீது அளவுக்கு மீறிய பற்றும், தெரியாத சூழலில் சிக்கிக்கொள்ளும் பயமும், உயிரைக் காப்பாற்றும் போராட்டமும் என ஒவ்வொரு உணர்வையும் இயல்பாக வெளிப்படுத்தியுள்ளார். குறிப்பாக தனியாக வரும் காட்சிகளில் கூட பார்வையாளர்களின் கவனம் சிதறாமல் தக்க வைத்திருப்பது அவரது நடிப்பின் பலமாகும்.
கருணாகரன் தனது இயல்பான நடிப்பால் கதைக்கு தேவையான இலகுத்தன்மையை கொடுத்திருக்கிறார். ஜனனி சாமிநாதன், உரியடி சிவா, ஆடுகளம் நரேன் உள்ளிட்ட அனைவரும் தங்களுக்கான கதாபாத்திரங்களில் சிறப்பாக பொருந்தியுள்ளனர். வீராவின் தாயாக நடித்தவர் தேவதையாகவே நடித்து அனைவரையும் ரசிக்க வைத்திருந்தார்.
ரயீஸ் அஹ்மத்தின் ஒளிப்பதிவு இந்த திரைப்படத்தின் மிகப்பெரிய தூண். அடர்ந்த காட்டின் அமைதியையும், அதற்குள் பதுங்கியிருக்கும் மர்மத்தையும் ஒவ்வொரு ஃப்ரேமிலும் உணர வைத்திருக்கிறார். இயற்கை எழிலும், இருள் நிறைந்த அச்சமும் இணைந்த காட்சிகள் படத்திற்கு கூடுதல் பலம் சேர்க்கின்றன.
ராஜ்குமார் சந்திரசேகரனின் பின்னணி இசை திரைப்படத்தின் உயிர்நாடியாக அமைந்துள்ளது. திரையில் நடக்கும் ஒவ்வொரு திகில் தருணத்தையும் இசை இன்னும் பலப்படுத்துகிறது. குறிப்பாக சஸ்பென்ஸ் காட்சிகளில் பின்னணி இசை பார்வையாளர்களை இருக்கையின் நுனியில் அமர வைக்கிறது.
படத்தொகுப்பு கதையின் வேகத்தை பெரும்பாலும் தக்க வைத்திருந்தாலும், முதல் பாதியில் சில காட்சிகளை இன்னும் சுருக்கமாக அமைத்திருக்கலாம் என்ற எண்ணம் தோன்றுகிறது. இருந்தாலும் இரண்டாம் பாதியில் திரைக்கதை முழுமையாக ஈடுபடுத்தி அந்த குறையை மறக்க வைக்கிறது.
வழக்கமான ஹாரர் திரைப்படங்களைப் போல ஜம்ப் ஸ்கேர்களை மட்டுமே நம்பாமல், மர்மம், உளவியல் பதற்றம், த்ரில்லர் அம்சங்கள் ஆகியவற்றை இணைத்து கதை சொல்ல முயற்சித்திருப்பது பாராட்டுக்குரியது.
‘போட்டோகிராஃபர்’ என்பது ஒரு சாதாரண ஹாரர் படம் அல்ல. மர்மம் நிறைந்த காடு, விறுவிறுப்பான திரைக்கதை, தரமான ஒளிப்பதிவு, மிரட்டலான பின்னணி இசை மற்றும் அஷ்ரஃபின் நேர்த்தியான நடிப்பு ஆகியவற்றால் ரசிகர்களை இறுதிவரை ஈர்க்கும் ஒரு த்ரில்லர் அனுபவமாக அமைந்துள்ளது. சஸ்பென்ஸ் மற்றும் ஹாரர் திரைப்படங்களை விரும்பும் ரசிகர்களுக்கு இந்த படம் நிச்சயம் வித்தியாசமான அனுபவத்தை வழங்கும்.
