தமிழ் சினிமாவில் கிராமத்து வாழ்க்கை, காதல், ஊர் கட்டுப்பாடு, பஞ்சாயத்து போன்றவற்றை மையமாக வைத்து பல திரைப்படங்கள் வெளியாகியுள்ளன. அந்த வரிசையில், பாரம்பரிய கிராமத்து பஞ்சாயத்து முறையை நகைச்சுவையுடன் கலந்து, கோட்டிப்புல் விளையாட்டை கதையின் முக்கிய அம்சமாக வைத்து உருவாகியுள்ள திரைப்படம் ‘பஞ்சாயத்து பட்டி’. இப்படத்தை மோகன்தாஸ் கதை, திரைக்கதை, வசனம் எழுதி இயக்கியுள்ளார்.
கல்லூரி மாணவர்கள் சிலர் ‘பஞ்சாயத்து பட்டி’ என்ற கிராமத்தைப் பற்றி ஆவணப்படம் எடுக்க முயற்சிக்கின்றனர். அந்த ஊரின் வரலாற்றை அறிந்துகொள்ள அவர்கள் கேட்கும் கேள்விகளிலிருந்து கதை தொடங்குகிறது.
ஆற்றங்கரையோரம் அமைந்துள்ள ஒரு கிராமத்தில் முதன்முதலாக ஒரு குடும்பம் குடியேறுகிறது. காலப்போக்கில் மேலும் பல குடும்பங்கள் அங்கு குடியேற, அந்தக் கிராமம் வளர்ச்சியடைகிறது. முதலில் குடியேறிய குடும்பத்தைச் சேர்ந்தவர்களே தலைமுறை தலைமுறையாக ஊரின் பஞ்சாயத்து தலைவர்களாக இருந்து வருகின்றனர்.
இந்த நிலையில், பஞ்சாயத்து தலைவருக்கு இரட்டைக் குழந்தைகள் பிறக்கின்றனர். அவர்களில் ஒருவருக்கு ‘அமாவாசை’ என்றும் மற்றொருவருக்கு ‘பௌர்ணமி’ என்றும் பெயர் சூட்டப்படுகிறது.
இருவரும் வளர்ந்த பிறகு வித்தியாசமான முறையில் ஊரை நிர்வகிக்கின்றனர். அமாவாசை முதல் பௌர்ணமி வரை அமாவாசை நாட்டாமையும், பௌர்ணமி முதல் அமாவாசை வரை பௌர்ணமி நாட்டாமையும் மாறிமாறி பஞ்சாயத்து நடத்துகின்றனர்.
இப்படிப்பட்ட சூழலில், ஊரைச் சேர்ந்த காதல் ஜோடி ஒன்று நாட்டாமைகளின் கட்டுப்பாட்டை மீறி ஊரைவிட்டு வெளியேறி திருமணம் செய்துகொள்கிறது. சில காலத்திற்குப் பிறகு மீண்டும் சொந்த ஊருக்குத் திரும்பும் அவர்களை ஊர் மக்கள் ஒதுக்கி வைக்கின்றனர்.
இந்த அநியாயத்தை அறியும் அவர்களது நண்பன், நாட்டாமையிடம் நியாயம் கேட்கிறான். அப்போது கோட்டிப்புல் விளையாட்டில் தன்னைத் தோற்கடித்தால் மட்டுமே ஒதுக்கிவைக்கப்பட்ட குடும்பத்தை மீண்டும் ஊருக்குள் சேர்த்துக்கொள்வதாக நாட்டாமை நிபந்தனை விதிக்கிறார்.
அந்தச் சவாலை ஏற்றுக்கொள்ளும் நாயகன் கோட்டிப்புல் விளையாட்டைக் கற்றுக்கொண்டு நாட்டாமையை வீழ்த்தினாரா? ஒதுக்கிவைக்கப்பட்ட குடும்பத்திற்கு நியாயம் கிடைத்ததா? என்பதே படத்தின் மீதிக்கதை.
படத்தின் நாயகனாக விஷ்ணு கதாபாத்திரத்தில் நடித்துள்ள ஜெய், கிராமத்து இளைஞனுக்கே உரிய இயல்பான நடிப்பை வெளிப்படுத்தியுள்ளார். நட்பு, காதல், நியாயத்திற்காகப் போராடும் குணம் என தனது கதாபாத்திரத்திற்குத் தேவையான பங்களிப்பை வழங்கியுள்ளார்.
நாயகியாக கயல்விழி கதாபாத்திரத்தில் நடித்துள்ள வினோஸ்ரீ, கிராமத்துப் பெண்ணாக இயல்பான நடிப்பால் கவனம் ஈர்க்கிறார்.
நாயகனின் நண்பர்களாக வரும் ஸ்பேனர் பாண்டி, நட்டு போல்ட் ஆகியோர் தங்களது நகைச்சுவையான செயல்பாடுகளால் படத்திற்கு கலகலப்பைச் சேர்க்கின்றனர். அமெரிக்கா நண்பராக வரும் கண்ணனும் தனது கதாபாத்திரத்திற்கு ஏற்ற நடிப்பை வழங்கியுள்ளார்.
அமாவாசை நாட்டாமையாக நடித்துள்ள பிரபாகரன், வில்லத்தனமும் நகைச்சுவையும் கலந்த நடிப்பால் கவனம் பெறுகிறார். பௌர்ணமி நாட்டாமையாக வரும் கேசவன், தனது தனித்துவமான கதாபாத்திரத்தின் மூலம் ரசிக்க வைக்கிறார்.
வாய் பேசாத நகைச்சுவைக் கதாபாத்திரத்தில் நடித்துள்ள ரங்கன், வசனங்கள் இல்லாமலேயே உடல்மொழி மற்றும் முகபாவனைகளால் சிரிக்க வைக்க முயன்றுள்ளார்.
திவாகர் மற்றும் ராஜிவ் இசையில் பாடல்கள் கிராமத்து கதைக்களத்திற்கு ஏற்ற வகையில் அமைந்துள்ளன. பின்னணி இசையும் காட்சிகளின் தன்மைக்கேற்ப ரசிக்க வைக்கிறது.
ஒளிப்பதிவாளர் மோகன்தாஸ், கிராமத்தின் இயற்கை அழகையும் அதன் வாழ்வியல் சூழலையும் காட்சிப்படுத்தியுள்ளார். படத்தொகுப்பையும் அவரே கவனித்துள்ளார்.
ராஜிவ் மற்றும் மோகன்தாஸ் எழுதியுள்ள பாடல் வரிகளும், ராஜுனின் கலை இயக்கமும் படத்தின் கிராமத்து பின்னணிக்கு உறுதுணையாக அமைந்துள்ளன.
கதை, திரைக்கதை, வசனம், இயக்கம் எனப் பல பொறுப்புகளை ஏற்றுள்ள மோகன்தாஸ், வழக்கமான கிராமத்து பஞ்சாயத்து கதையைச் சற்று வித்தியாசமான அணுகுமுறையில் சொல்ல முயன்றுள்ளார்.
அமாவாசை, பௌர்ணமி என இரண்டு நாட்டாமைகள் மாறிமாறி ஊரை நிர்வகிப்பது, காதல் திருமணத்தால் ஏற்படும் பிரச்சினை, அதற்குத் தீர்வாக கோட்டிப்புல் விளையாட்டை முன்வைப்பது போன்ற அம்சங்கள் கதைக்கு சுவாரஸ்யம் சேர்க்கின்றன.
கிராமத்து மனிதர்களின் பழக்கவழக்கங்கள், ஊர் கட்டுப்பாடுகள், நட்பின் முக்கியத்துவம் ஆகியவற்றை நகைச்சுவையுடன் இணைத்திருப்பது படத்தின் சிறப்பாக அமைந்துள்ளது.
குறிப்பாக, மறந்துபோன பாரம்பரிய கிராமத்து விளையாட்டுகளில் ஒன்றான கோட்டிப்புல்லை கதையின் முக்கிய திருப்புமுனையாகப் பயன்படுத்தியிருப்பது பாராட்டுக்குரியது.
நகைச்சுவையை முன்னிலைப்படுத்தி கதையை நகர்த்தியுள்ள இயக்குநர், ஊர் கட்டுப்பாடுகளால் பாதிக்கப்படும் மனிதர்களின் உணர்வுகளையும் பதிவு செய்ய முயன்றுள்ளார்.
மொத்தத்தில்
‘பஞ்சாயத்து பட்டி’ – கிராமத்து மணம், கலகலப்பான நகைச்சுவை, நட்பு, காதல், பாரம்பரிய விளையாட்டு என அனைத்தையும் கலந்து உருவாகியுள்ள ஒரு எளிமையான பொழுதுபோக்குத் திரைப்படம்.
