‘நடுவுல கொஞ்சம் பக்கத்த காணோம்’, ‘இதற்குத்தானே ஆசைப்பட்டாய் பாலகுமாரா’ உள்ளிட்ட படங்களை தயாரித்த லியோ விஷன் (Leo Vision) நிறுவனம், நடிகை நித்யா மேனனின் கேயுரி புரொடக்ஷன்ஸ் பிரைவேட் லிமிடெட் (Keyuri Productions Pvt Ltd) நிறுவனத்துடன் இணைந்து புதிய திரைப்படத்தை தயாரிக்கிறது. தற்போது ‘புரொடக்ஷன் நம்பர் 5’ என தற்காலிகமாக பெயரிடப்பட்டுள்ள இப்படம் குறித்த அதிகாரப்பூர்வ அறிவிப்பு வெளியாகியுள்ளது.
இயக்குநர் டி.கே. இயக்கத்தில் உருவாகும் இந்த பெயரிடப்படாத திரைப்படத்தில், நடிகை நித்யா மேனன் கதையின் நாயகியாக நடிக்கிறார். வித்தியாசமான கதைக்களத்துடன் உருவாகும் இப்படம் Fantasy with Dark Comedy ஜானரில் உருவாகிறது.
படத்தின் ஒளிப்பதிவு பணிகளை ஏ. சக்திவேல் மேற்கொள்கிறார். படத்தொகுப்பு பணிகளை ரிச்சர்ட் கெவின் கவனிக்கிறார். இப்படத்தை தயாரிப்பாளர் வி.எஸ். ராஜ்குமார் தலைமையிலான லியோ விஷன் நிறுவனமும், நடிகை நித்யா மேனனின் கேயுரி புரொடக்ஷன்ஸ் பிரைவேட் லிமிடெட் நிறுவனமும் இணைந்து தயாரிக்கின்றன.
மேலும், இயக்குநர் விக்ரம் கே. குமார் இப்படத்தின் கிரியேட்டிவ் புரொடியூசராக பொறுப்பேற்றுள்ளார்.
வித்தியாசமான கூட்டணியில் புதிய முயற்சி
லியோ விஷன், கேயுரி புரொடக்ஷன்ஸ், நித்யா மேனன், இயக்குநர் டி.கே. மற்றும் விக்ரம் கே. குமார் ஆகியோரின் கூட்டணியில் உருவாகும் இந்த புதிய திரைப்படம், வழக்கமான திரைப்பட அனுபவத்திலிருந்து மாறுபட்ட ஃபேண்டஸி மற்றும் டார்க் காமெடி கலந்த திரையரங்க அனுபவத்தை ரசிகர்களுக்கு வழங்கும் என எதிர்பார்க்கப்படுகிறது.
குறிப்பாக, கதையின் நாயகியாக நித்யா மேனன் நடிப்பதால், இப்படத்தின் கதாபாத்திரமும் அவரது நடிப்பும் ரசிகர்கள் மத்தியில் எதிர்பார்ப்பை ஏற்படுத்தியுள்ளது.
ஐந்து மொழிகளில் வெளியாகும் திரைப்படம்
தமிழ் ரசிகர்களை மட்டுமின்றி தென்னிந்திய மற்றும் இந்திய அளவிலான பார்வையாளர்களை சென்றடையும் வகையில் இப்படம் தமிழ், தெலுங்கு, மலையாளம், கன்னடம் மற்றும் இந்தி ஆகிய ஐந்து மொழிகளில் வெளியாகவுள்ளது.
இப்படத்தில் நடிக்கும் ஏனைய நடிகர்கள் மற்றும் நடிகைகள், தொழில்நுட்பக் கலைஞர்கள் குறித்த கூடுதல் தகவல்கள் விரைவில் அதிகாரப்பூர்வமாக வெளியிடப்படும் என படக்குழுவினர் தெரிவித்துள்ளனர்.
அதேபோல், தற்போது ‘புரொடக்ஷன் நம்பர் 5’ என அழைக்கப்படும் இப்படத்தின் அதிகாரப்பூர்வ தலைப்பும் விரைவில் அறிவிக்கப்படும் என எதிர்பார்க்கப்படுகிறது.
